(ERGO) – Raxmo Mayow Cabdi iyo labadeeda carruur ah oo labo jir iyo shan jir kala ah waxay tan iyo 8 Janaayo ku hoyanayeen geed hoostii. Haweeneyda iyo carruurteeda ayaa ka tirsan 568 qoys oo si khasab ah looga soo barakiciyay xerada Rabbi Yasir oo ku taalla deegaanka Garas-baalley ee duleedka magaalada Muqdisho. Qoysaskan ayaan hadda haysan hoy, biyo, cunto iyo musqulo.
“Hadda aniga wax gacan iigu jira ma laha. Guri wax aan ku dhisto ma haysto, bannaankaas ayaan iska seexdaa, geedaha hoostooda. Wax kasta ayaan qabnaa. Tuugo way iimaanayaan haddaad bannaan joogto wax walba filo,” ayay tiri.
Dhulka ay xerada ku taallay waxaa dadka siiyay nin ganacsade ah oo sheegtay lahaanshahiisa. Balse, dad ay ninkaas isku qabsadeen dhulka ayaa ku guuleystay kiis maxkamadda yaallay, waxayna ku amreen dadkii barakaca ahaa inay uga guuraan dhulkooda.
Raxmo waxay xerada ku nooleyd labo toddobaad oo keliya intii aan laga barakicin. Waxay ka soo barakacday miyiga Diinsoor ee gobolka Bay, 22 Diseembar ee 2021-ka, kaddib markii qoyskeeda ay abaartu ka dishay 15 neef oo ari ah iyo lix lo’ ah oo ay dhaqanayeen.
Waxay Raadiyow Ergo u sheegtay in saddex ka tirsan carruurteeda ay uga soo tagtay seygeeda oo ku haray Diinsoor. Qorshaheeda ayaa ahaa inay seygeeda iyo carruurta kale ay gayso Muqdisho, marka ay hesho gargaar iyo hoy.
Raxmo waxay xustay inay 86 qoys oo kale habeenkii la seexan jirtay dugsiyada xerada ku dhex yaalla oo ka koobnaa afar hool. Waxay cunto bisil oo hal waqti ah ka heli jireen maamulka xerada.
Tan iyo intii laga barakiciyay xerada waxay nolosheeda ka soo saarataa shaqo dhar dhaqis ah oo maalinkii ay hesho ay ka soo gasho nus doollar.
Qaar ka tirsan qoysaskii muddada dheer deggenaa xerada ayaa la siiyay dhul bannaan oo si ku meel gaar ah ay ugu noolaan doonaan. Dhulkan ayaa u dhow xerada Rabbi Yasir.
Faadumo Axmed oo ah hooyada shan carruur ah, waxay xerada deggeneyd sagaal sano. Waxay booskii la siiyay ka dhisatay aqal yar oo ka sameysan maryo iyo alwaaxyo oo ay ka soo aruursatay magaalada.
Haweeneydan oo carruurteeda kaligeed korsata ayaa sheegtay in ay nolol-maalmeedka qoyskeeda uga soo saari jirtay shaqo xamaali ah oo ay ka qaban jirtay suuqa Bakaaraha. Waxay alaabta ku xamaali jirtay dambiil, waxayna maalinkii heli jirtay labo ilaa iyo saddex doollar. Tan iyo intii la barakiciyay ma aysan helin fursad ay ku soo shaqeysato maaddaama ay ku mashquushay dhisidda aqalkeeda.
Horjoogaha xerada Rabbi Yasir, Farxiya Axmed Xayle, ayaa sheegtay in dadkan sida khasabka ah loo barakiciyay ay hadda la daalaa-dhacayaan quudinta qoysaskooda, maaddaama ay meesha ku lumeen ganacsiyadii ay nolol-maalmeedkooda ka soo saaran jireen. In ka badan 300 oo qoys ayay sheegtay in aysan haysan hoy. Qoysaska hoy-la’aanta ah ayay xustay inay seexdaan geed hoostiis.
Xerada Rabbi Yasir, waxay lahayd xarun caafimaad, madaraso iyo iskuul.
