Seddex boqol oo neef oo ari ah ayaa saddexdii toddobaad ee la soo dhaafay cudurka Furuqa ee xoolaha ku dhaca ugu geeriyooday deegaanka Galo oo 45km dhanka bari kaga beegan magaalada Dhuusa-mareeb ee xarrunta gobolka Galguduud.
Cudurka oo 10-kii Julaay ka dillaacay deegaanka ayaa ku dhacay xoolaha 180 qoys, iyadoo hadda cudurku uu hayo xoolo lagu qiyaasay 3,000 oo neef, sida uu Raadiyo Ergo u sheegay guddoomiyaha deegaanka Galo Siciid Cali Cabdi.
Dhaqaatiirta xanaanada xoolaha ee magaalada Dhuusamareb oo daaweyn ka sameeyay deegaano ku dhow Galo ayaan gaarin halka cudurka Furuqa uu ka jiro, iyagoo sheegay in aysan heyn tallaalka cudurkaas, sidaas darteedna aysan tagi karin Galo sida uu markale sheegay Siciid.
Cabdullaahi Kadiye waa 45 jir qoyskiisu ka kooban yahay siddeed qof, wuxuu ari dhan 100 neef ku dhaqdaa deegaanka Galo. Cudurka Furuqu ayaa uga dhacay 50 neef oo arigiisa ka tirsan, iyadoo ay ka dhinteen 20 neef, halka 30 kale ay weli la liitaan. Wuxuu Raadiyo Ergo u sheegay inuu magaalada Dhuusamareeb oo uu dawo u doontay uu ka waayay beddelkeedna uu xoolihiisa mariyo daawada loogu talo galay dhamiijada oo aan waxba ka tarin xanuunka haya xoolihiisa.
Cabdullaalihi ayaa sheegay in xoolaha markii uu cudurka ku dhaco uu hayo muddo toddobaad ah dabadeedna uu u dhinto taas oo saamayn ku yeelatay nolosha qoyskii.
Qoyska Cabdullaahi oo caanaha xoolaha iyo iibsashadooda ku tiirsanaa, ayaa hadda raashinka reerkiisu cuno ka deynsada baqaar uu raashinka ka iibsan jiray oo ku yaalla Dhuusamareeb, maaddaama xoolihiisu aysan waqtigan ku jirin, kuwo iib gala. Afar iyo tobon riyo oo u irmaanaa ayaa ka guray kuwaas oo ka mid ahaa kontonka neef ee cudurku kaga dhacay.
Dadka xoolo-dhaqatada ah ayaa aaminsan in xooluhu ay cudurka ku kala qaadayaan halka ay biyaha ka cabaan iyo sidoo kale dhirta ay wada harsadaan ama marka ay isku darmaan, sidaasna ay isugu gudbiyaan.
Warsame Cadceed Dhiblaawe, waa 40 jir, qoyskiisu ka kooban yahay toddobo qof. Wuxuu leeyahay 200 oo neef oo ari ah, waxaana 100 neef oo ka tirsan xoolihiisa uga dhacay cudurka Furuqa, iyadoo ay uga dhinteen 40 neef, halka ay 60 kale wali la liitaan xanuunka saddexdii toddobaad ee la soo dhaafay.
Warsame ayaa Raadiyo Ergo u sheegay in neefku markuu xanuunsado uu bilaabayo qufac, kaddibna korkiisa ay ka soo baxayaan nabaro biyo ku jiraan, kaddib toddobaad uu neefkii ku dhimayo, halka kuwa ka badbaadana uu hilibku ka dhammaanayo oo haraga iyo lafuhu isku soo harayaan. Wuxuu intaas ku daray in arigiisa 20 maalmood oo uu xanuunku hayo weli uu soo ridanayo kuwo hor leh.
Dr Suleyman Maxamed Saalax oo ku taqasusay daweynta xoolaha ayaa Raadiyo Ergo u bandhigtay astaamaha ay xoolo-dhaqatadu ka sheegeen xoolaha wuxuuna sheegayn inuu yahay cudurka Furuqa isagoo xusay in cudurkan uusan daawo lahayn ka hortag mooyee.
Dr. Suleymaan ayaa xoolo-dhaqatada kula taliyay in marka ay astaamahaas ku arkaan xoolohooda ay ka saaraan xerada, si aanay kuwa kale u qaadsiin, isla markaana ay xero ka fog u sameeyaan, sidoo kalena haddii la heli karo ay wargeliyaan dhakhaatiirta xanaanadaha xoolaha.
Cudurkan ayuu sheegay in inta badan la arko xilliyada uu qabowgu jiro ama marka kuleyl daran uu jiro. Waxaana deegaanka Galo waqtigan ka jira dabaylo habeenkii dhaca, kuwaas oo qabow wata.
