Tahriibka ayaa qiime aad u sareeya ugu kacaya bulshada ku nool degmada Buuhoodle, xaaladaan tahriibka oo aafeeyey dadka deegaanka ayaa sheegay inay olole ugu jiraan wax ka qabashada tahriibka. Dhalinyaro wax ka barata jaamacaddaha goboladda kala duwan ee wadanka iyo gudaha Buuhoodle oo hadda xilligii fasax ku soo noqday guryahooda ayaa abuuray urur la dhaho Iftiin oo ka dhan ah tahriibka.
Cabdalla Axmed Maxamed waa gudoomiyaha guddigaan “Runtii waxaa nagu kelifay hawshaan, bulshada deegaanka oo ay si isku mid ah u saamaysay dhibaatadda tahriibku, waxaan marka samaynay baaritaan inta dhibaatadu le’egtahay, guriguri ayaan deegaanka u marnay si aan u helno xog, waxaan diwaan gelinay 390 dhalinyaro ah oo ka tahriibtay Buuhoodle tan iyo 2011, ayna ku baxday aduun ka badan 2 milyan oo dollar”.
Lacagtaani waxay jebabkooda ka baxday qoysas kunool degmo dhaqaalaheedu ku tiirsan yahay xoolo dhaqato iyo ganacsi yar yar, Koos Muxumad Xoosh waa hooyo dukaan yar oo dharka lagu iibiyo ku haysata degmadda, bil ka hor ayuu ka tahriibay wiil ay carruurba la lahayd.
“Isagaan uga tegey dukaanka oo waxaan u safray Jabuuti, markaan soo noqday oo Hargeysa marayo ayaa la ii sheegay in wiilkii tahriibay, waxaanan bilaabay inaan dadkii dhex galo oo dadku ii gurmadaan ilana ururiyaan lacagtii magafe soo dalbaday oo ahayd 5 kun oo dollar.
Cabdullaahi Yuusuf Cabdi walaalkii oo ka yaraa oo la nolaa ayaa galay tahriibka, wuxuuna Ergo u sheegay “Anniga 10 kun oo dollar ayaan u diray, 5500 oo dollar ayaan u diray Magafe oo xawaaladda u dhigay, gurigaygii aan deganaa ayaan u xaraashay oo la iga siistay 15 kun oo dollar, tahriibkiisii ayeyna ku baxday, ilaa hadda kadeedkii tahriibkaasi I baday wuu iga muuqdaa, ma haysto hoy ay carruurtaydu galaan”.
Cabdilaahi Jaamac oo ka mid ah ganacsatadda degmadda ayaa isagu sheegaya in isticmaalka aaladda casriga ah oo baraha bulshadu ka mid yihiin meelaha dhiiri geliya tahriibka, loona bahan yahay isticmaalka dhalinyarada in lala fiiriyo.
Xamdi Cabdirisaa oo ka dhigta darasaadka Islaamka jaamacadda Bariga Afrika faraceeda buuhoodle ayaa sheegtay “Waalidka oo aan jihayn u samayn dhalinyarta marka ay dhamayaan waxbarashada dugsiga sare ayaa iyana qayb ka ah, tusaale ahaan Hooyo uu wiilkeedii maalin dhowd tahriibay intuusan tahriibin ayuu waydiistay lacag afar kun ah oo uu ku gato gaari yar oo uu ku shaqaysto, wayna ka diiday, isla todobaadkiina wuu tahriibay, waxayna dantii ku khasabtay inay bixiso 8 kun oo dollar oo ay siiso ma gefe iyo dadkii wax tahriibinayey, waana dhibaatooyin haysta bulshada una bahan in si hoose wax looga qabto arrimahaani”.
Khadar Cawil
