Tiradii ugu badnayd ee dad qaxooti ah oo ka soo cararay dagaaladda Yemen ayaa soo gaaray Boosaaso maalintii khamiista ahayd ee 2 July 2015, siduu Ergo u sheegay Cabdilaahi Xaashi Qoobdeero oo ah wasiir ku xigeenka arrimaha guddaha ee Puntland ahna madaxa guddiga taakulaynta dadka ka soo noqonaya Yemen.
“2 bisha July markab la yiraahdo Nawaal ayaa ku soo xirtay Boosaaso, oo sida 3500 oo qof, dadkaan oo u badan dumar iyo carruur, annagoo geynay xarunta loogu tala galay in lagu nasiyo.”
Saraakiisha caafimadka ayaa sheegay inay jiraan dad qaba dhaawacyo, Dr Cabdiraxmaan Cali Cabdiraxmaan oo ah hawl wadeennada caafimaad ee dadkaan soo noqonaya daaweynaya ayaa Ergo u sheegay, “Dadka markabkaan saaran diif badan ayaa ka muuqata, tamar darro ayaa jirta, afar qof oo lugaha iyo gacmaha ka dhaawacan ayaa ku jira oo ku dhaawacmay dagaallada Yemen ka socda, waxaana ugu daran wiil labada lugood ka bur bursan, lix qof oo shubmaya ayaa iyana aan ka soo dejinay.”
Ayaan Cabdi oo ah hooyo dhashay shan carruur ah kana mid ahayd dadkii la socday markabka ayaa Ergo u sheegtay in wiil ay dhashay uu kaga dhintay 23 Juun 2015 markii madfac ku dhacay xaafadda Basaatiin ee Cadan oo ay deganaayeen, markabkaanna ay ka soo raaceen dekedda Mukulla.
Xaliimo Yoonis oo iyana ahayd hooyo kale oo ka mid ahayd dadka yimid ayaa sheegtay inay muddo labatan beri ah qabto dhaawac ka soo gaaray dhinaca oo firir madfac kaga dhacay.
Wasiir Qoobdeero ayaa Ergo u sheegay xarunta dadka lagu nasiyo ay 50 qof oo dadkii hore u yimid ku sii harsan yihiin kuwaasoo iyana sabtida ay u ambabixinayaan meelahay ka yimaadeen, ayna hadda gudigu bilaabeen diwaan gelinta goobahay doonayaan dadkaani inay u safraan.
Faadumo Taxadar
