Iyadoo lagu guda jiro bisha barakeysan ee Ramadaan ayaa waxaa gudaha magaalada Baydhabo xaalad bani’aadannimo ay ku heysataa qoysas barakacyaal ah oo markoodii hore kasoo barakacay qaar ka mid ah degmooyinka gobalka Bay, sida Qansax-dheere iyo Diinsoor.
Ilaa 4 boqol oo qoys oo ku jira xerada barakacyaasha ee Tawakal oo ku taalla duleedka koofureed ee magaalada Baydhabo ayaa xilligan ay soo wajahday xaalad khatar ah oo dhanka nolosha iyo hoyga ahba, sida uu soo tebinayo weriyaha Ergo ee Baydhabo oo booqday xeradaas.
Dadkani ayaan heysan cuno, biyo ku filan iyo hooy fiican oo ay ka galaan kulaylka qorraxda iyo dhaxanta xagaaga, qoyaskan ayaa Ergo u sheegay in aysan haysan rashiin ay ku afuraan iyadoo xitaa mararka qaar ay wayaaan biyaha iney dab shitaan iska daayee.
Muddo laba sano ah oo ay qoysaskan deggan yihiin xerada sooma gaarin wax gargaar ah, magaalada ayaana ka dheer oo loo sii socod iyo soo socodba loo soconayo saddex saacadood, mana aha kuwo shaqooyin u doonan kara.
Cabdi Maxamed Isxaaq oo ah Aabbe boqol sano jir ah, xerada uu ku jiro ee Tawakal uma joogaan qoyskiisa ama reero kale oo caawiya, waxaa uu ku jiraa aqal yar oo dhinacna maro ka saaran dhinac kalana ka feydan, markiisii hore waxaa uu ka mid ahaa beeralelyda degmada Qansax-dheere.
“Laba sano ayaa halkan fadhiyaa, cid aan mar wax ka heley malahan, boqol sano ayaa jiraa, dadka halkan ila jooga qaar way xamaashan, aniga maba dhaqaaqi karo waan duqoobay, ced ii joogto malahan dadka ayaa i caawiyo nolasha aan ku jiro way liidataa caawinaad ayaan rabnaa.” Ayuu Ergo u sheegay Cabdi.
Caasho Cabdi Cabdiraxmaan oo haysata 9-carruur ah oo aabbahoodu dhintay ayaa sheegay inaysan dab shidan maalmo, iyadoo qoysaska qaar biyo keliya ku afura oo aysan heysan wax kale.
“Annaga markii hore deegankeenna waxaan uga soo cararnay nolol xumo, dagaallo, waxaaba kasii darna marka Baydhabo soo gaarnay oo aan fileynay in xaalkeenna is baddalo, ayaan sidaan aragnay, 9-ka carruurta ah dab uma shido, meel aan seexiyo mahayo, marka dhibaato tan oo kale ah waligeed nama soo marin,” ayay tiri Caasho.
Guddoomiyaha arrimaha bulshada ee gobalka Bay Maxamed Isxaaq Abuukar ayaa Ergo uga warramay waxa uu maamulkoodu ka ogyahay xaaladda ay barakacayaashan ku sugan yihiin. “Waa run xaaladda way jirtaa, dhibaatada koowaad waxaa keenay isbecdelka maamulka dhowaan dhacay, tan kale hay`adaha magaalada oo sidii la rabay aan wax u qaban, laakiin waan la soconnaa dhibaatada soo wajahday barakacyasha magaalada, waxaan wadnaa dadaal lagu caawinayo bishan Soon, waana ku dadaaleynaa in aan xaalkooda wax ka beddelno,” ayuu yiri.
Carruurta, waayeellada iyo haweenka nuujinaya carruurta ayaa ah kuwa aan xamili karin gaajada ka jirta xeryaha, waxayna ka codsanayaan hay`adaha gargaarka iyo bulshada Soomaaliyeed inay caawinaad lasoo gaaraan.
Muxyadiin Xasan Maxamed/FM
