Ololaha cirribtirka cudurka dabeysha iyo kan ka hortagga jadeecada oo wada socda ayaa ka bilowday deegaannada gobolka Bari, wuxuuna socon doonaa muddo 5 maalmood ah, iyadoo lagu beegsan doono carruurta ay da`doodu ka yar tahay 5ta sano.
Saciid Maxamed Waraabe oo ah isu-duwaha wasaaradda caafimaadka ee gobolka Bari ayaa Ergo uga warramay sababta la isugu daray labada tallaal, “sababta la isugu daray labada tallaal waxay tahay in dillaacitaan badan oo xanuunka dabeysha ah uu kusoo laalaabtay guud ahaan Soomaaliya, marka waxaa dardar gelin lagu waday cirribtirkiisa, jadeecadana waa xanuun weli ka jira dalka, sidaas baa la isugu daray in looga hortago inay carruurta ku dhacaan.” Ayuu yiri Saciid.
Ilaa 306 koox isugu jirta tallaalayaal iyo wacyigeliyeyaal ayay wasaaradda caafimaadka u dirtay deegaannada Bari, kooxahaa ayaa guri-ka-guri u fulinaya tallaalka oo carruurta iyo hooyooyinka ugu tegaya xaafadaha, iyagoo isla markaana ku dhiirri gelinaya waaliddiinta inay mar walba tallaalaan carruurtooda.
Joharo Muuse oo ka mid ahayd hooyooyinka carruurtooda loo tallaalay ayaa sheegtay inay weligeedba carruurteeda tallaali jirtay ayna aaminsan tahay. “Tallaalku weligeyba waan jeclaa, waxaan ogahay inuu faa`iido badan leeyahay waanan la socdaa inuu ka hortago cudurro badan, hadda carruurteydu way ii caafimaad qabaan.”
Caa`isha Cali Maxamed oo afar ka mid ah carruurteeda loo tallaalay ayaa sheegtay inay bilowday oggolaatay tallaalka kadib markii 6 sano kahor ay gabadh ka mid ah carruurteeda u naafowday dabeysha, “Markii hore laba ka mid ah carruurteyda ayaan tallaalay, mid ka mid ah labada aan tallaalin oo gabar ah aya naafowday, markaas baan go`aansaday inaan mar walboo ololuhu uu socdo tallaalo dhammaantood,”
“Gabadheyda hadda waxba lagama qaban karo oo waa naafowday, laakiin waaliddiinta waxaan ku waanin lahaa inay carruurtooda ka difaacaan inay naafoobaan, waa laba dhibcood keliya oo aan dhib lahayn.” Ayay mar kale tiri Caa`isha.
Khadra Maxamed Xasan/FM
