200 oo haween waayeel ah ayaa barashada dhigaalka farta Soomaaliga oo lacag la’aan ah uga bilaabatay dugsi ku yaal degmada Xamar Jajab ee magaalada Muqdisho. Haweenkan oo hooyooyin u badan ayaan horey u helin fursado waxbarasho oo la xariirta dhigaalka iyo aqrinta farta Soomaaliga.
Batuulo Cabdiraxmaan Cusmaan oo ah 50 sano jir ka mid ah hooyo baranaya dhigaalka iyo aqrinta farta Soomaaliga ayaa raadiyoow Ergo u sheegtay in waaliddiinteed iyada oo carruur ah ay dhinteen kadibna aysan helin cid dugsiyada geysa, oo mas`uul ka noqota nolosheeda.
Awliyo Faarax Wareeri oo iyana 60 sano jir ah waxa ay sheegtay inay qalinka u qaadatay si ay dhigaalka Soomaaliga u barato, una noqoto qof dadka kale kula xiriiri karta dhanka qoraalka. Waxa ay aaminsan tahay in barashada farta Soomaaliga iyo xisaabta ay ku caawin doonaan inay fahanto isticmaalka mobile-ka oo ay dhib ku qabto.
“Waxbarashadu malaha da’ gaar ah, waqti walba ayeynu wax baran karnaa,” ayey tiri Faadumo Maxamed oo ka mid ah haweenka 40ka ah ee barashada dhigaalka afsoomaaliga baranaya. Waxa ay sheegtay inay ku hanweyn tahay in ay ka baxdo mugdiga jahligu dhex dhigay, awood u yeelato aqrinta iyo qoraalka farta Soomaaliga si ay u noqoto qof wax badan og.
Weriyaha Ergo ee magaalada Muqdisho oo booqday dugsiga haweenka wax lagu barayay wuxuu leeyahay haweenka ardeyda iyagoo xambaarsan carruurtooda ayey yimaadaan dugsiga, qaarkoodna fasallada ayeyba la dhex fadhiistaan ubadkooda. Farxiyo Shire Ciidle ayaana ka mid ah haweenkaas.
“Majirto cid aan kaga soo tago xaafadda waana sababta aan ula soo aado iskuulka,” ayey u sheegtay weriyaha Ergo ee booqday.
Ardey ka qalinjabisay dugsiyada sare ee magaalada ayaa haweenkan si lacag la’aan ah u baraya dhigaalka iyo aqrinta afkooda. Maxamed Nuur Jimcaale, Guddoomiyaha ururka dhallinyarada FARDO ee hirgeliyay mashruucan ayaa raadiyoow Ergo u sheegay inay muhiim tahay in la kordhiyo garaadka iyo aqoonta haweenka Soomaaliyeed u leeyihiin dhigaalka afkooda.
“Waa hooyooyinka na dhalay, korriimadeenna ayeyna waxbarashada uga mashquuleen, marka waa in aan hadda uga faa’iideyno waxa aynu barannay,” ayuu yiri Maxamed.
Abdikadir Maxamed Cabdulle/MR/FM
