Garowe ayaa waxaa ka socda dadaallo la doonaya in kor loogu qaado tayada wax qabad ee dadka naafadda ah, kulan la qabtay bartamihii toddobaadka ayaa waxaa looga shiray dhiiri-gelinta dadka naafada gobollada Puntland ee xuquuqdooda asaasiga ah, doorka siyaasada, doorka horuumarinta bulshada ee waxbarashada, caafimaadka iyo dhaqaalaha dadka lixaadka la’a.
Hay’adda Handicap oo ka shaqaysa howlaha taageerada iyo la socodka naafada ayaa sheegtay in la damacsan yahay in guulo laga gaaro caqabado badan oo waqtigan jira, kuwaas oo sahlaya niyad jab hor leh oo ay la kulmaan dadka aan lixaadka dhamayska ah lahayn.
“Muhiimadda waqtigan ee loo kulmay waa in khibrad la wadaago, si loogu qareemo xuquuqdooda iyadoo la midaysan yahay.” Ayuu yiri madaxa Handicap Maxamed Faarax oo ka hadlayey shirka ururrada naafada ee Garoowe lagu qabtay.
Gudoomiyaha guud ee dalladaha Naafada ee gobolka Cali Cabdi Aadan ayaa shirka ka sheegay in hoos dhac weyn jiro “ Ma jiro horuumar buuran oo naafadu ka sameeyeen teknooloojiyada casriga ah, waxaa la isla qaatay in la helo dad ka shaqeeya dhinaca combiuutarradaoo naafada ku dhiiri-geliya in ay la jaan-qaadaan bulshada kale.”
Horumarka naafada gobolka ayaa la tilmaamay in ay caqbad ku yihiin deegaanka iyo bulshada, hay’adaha ka shaqeeya daryeelkooda iyo dalladaha gobolka ayaa ku dhawaaqay in ay ku han-wayn yihiin in guul laga gaaro dhibaatada badan ee hortaagan horuumarka naafada taas oo mudan in laga gudbo.
“Waxbarashada iyo caafimaadka ayaa qayb ka ah meelaha ay awood xumada kala kulmaan naafadu.” Ayuu yiri agaasimaha Handicap.
“ Bulshada ayey caqbaad kaga timaadaa, haddii uu lugaha go’an yahay xataa sida bulshada caadiga ah buu wax u qaban karaa, laakiin waa haddii loo fududeeyo, muhiim waxaa ah in bulshada wacyigeeda la beddelo, oo lagu dhiirri-geliyo in ay dadka lixaadka la’a ka caawiyaan dhinacyada waxbarashada, caafimaadka iyo is dhex-galka.” Sidaas waxaa sheegay Maxamed Faarax mar uu tilmaamay caqabadaha ka jira Puntland ee dhanka naafada.
Wasaaradda caafimaadka Puntland ayaa ku baaqday in la sameeyo wacyi-gelin badan oo dadka lagu ogaysiinayo xuquuqda dadka Naafada ee gobolka, “ saxaafadda hala adeegsado ha la sameeyo wacyigelin badan oo ogeysiin ah.” Ayey tiri Sahra Cabdinaasir oo ka tirsan wasaarada caafimaadka.
Nuxurka guud ee kulanka ayaa noqday in la koriyo xuquuqda dadka naafada ee gobollada oo idil, Puntland haatan waxaa ka soo iftiimaya koboc waxbarasho oo dadka naafada ah ay helayaan in kastoo uusan gaarin halkii la rabay, waxaa kaloo weli liita doorkooda bulshada.
Gobollada Puntland waxaa haatan ka soo iftiimaya koboc waxbarasho oo dadka naafada ah helayaan in kastoo ay aad u liidato marka loo eego heerkii la rabay, xuquuqdooda kale ee doorka bulshada ayaa sidoo kale waxaa aad u hooseeysa xuquuqdooda kale ee doorka bulshada, in kastoo ay jiraan 21 urrur oo gobollada ka dhisan.
Cabdiraxmaan Maxamed Xaaji/MRS
