Wasaaradda arrimaha haweenka ee Puntland iyo xafiiska Qaramada Midoobay ee Soomaaliya ayaa dadaal ugu jira in haweenka kuraas ka helaan baarlamaanka cusub ee Puntland.
Ergayga gaarka ah ee xoghayaha guud ee Qaramada Midoobay u qaabilsan Soomaaliya Nicholas Kay oo toddobaadkan booqday Garoowe ayaa sheegay in Qaramada Midoobay aad u daneynayo in haween badan xubno ka noqdaan baarlamaanka cusub ee Puntland.
Mudane Kay wuxuu sheegay in kaalmaha siyaasadeed ee haweenka kala xaajooday ururada haweenka, odey-dhaqameedyada, ururada bulshada rayidka iyo madaxda dowlad goboleedka Soomaaliyeed ee Puntland.
“Waxaynu doonaynaa in aan aragno haween ka badan kuwo xubnaha hadda ka ah baarlamaanka oo kuraas hela,” ayuu Kay ugu sheegay weriyayaasha ku sugan Garoowe.
Hoggaamiyayaasha bulshada iyo odayaasha qabaa’illada ayaa dhawaan bilaabi doono magacaabista iyo xulushada xubnaha cusub ee baarlamaanka Puntland oo ah lixdan iyo lix xubin, kuwaas oo dooran doona madaxweynaha maamul goboleedka bisha January.
Wasiir ku xigeenka wasaarada arrimaha haweenka ee Puntland Caasho Maxamuud Cumar oo ergayga QM kula kulantay Garoowe ayaa sheegtay in xafiiska QM ay iska kaashanayaan dadaallo lagu doonayo in haweenku kaalmo firfircoon ka galaan siyaasada Puntland.
Inkastoo kala bar bulshada ku nool deegaanada Puntland ay haween yihiin, labo hablood oo kale ah ayaa xubno ka ah baarlamaanka Puntland. Tiradaas waxa ay aad uga yar tahay kuraastii haweenku ka heleen baarlamaankii ugu horeeyay ee Puntland sanadkii 1998 sida ay sheegtay wasiirad ku xigeenka wasaarada caafimaadka ee Puntland marwo Saynab Ugaas Yaasiin.
“Haweenku guddiga xulashada kuma jirana, odayaasha kama mid ahan. xitaa goobta lagu shirayo ma joogaan, sidaas darteed fursad badan uma heli doonaan xubin-nimada baarlamaanka Puntland ,” ayay marwo Saynab oo la hadashay raadiyoow Ergo.
Marwo Saynab Ugaas Yaasiin waxa ay ka mid tahay shantii gabadh uu xubinnimada ka helay baarlamaankii ugu horeeyay ee Puntland. Waxa ay marwo Saynab ka digtay in xitaa laga yaabo in rag la siiyo labada kuraas ee ay hablahu hadda ka haystaan baarlamaanka Puntland.
Xalima- Sacdiya/MR
