Boqollaal naafo ah oo ku nool magaalada Baydhabo ee xarunta gobalka Bay ayaa ka cabanaya saboolnimo iyo dayacnaan baahsan oo halis gelinaysa naftooda.
Xuseen Xasan Mursal oo madax ka ah urur la yiraa Alla Magan oo ay ku mideysan yihiin dadka naafada ah ayaa sheegay in naafada Baydhabo ku nool ay yihiin kuwo dayacan oo la deyriyay labaatankii sanno ee colaadaha.
Dad ka badan toddobo boqol qof oo naafo ah ayuu Xuseen sheegay inay ku nool yihiin magaalada Baydhabo. Kahor inta aysan lixaad waayin, dadkaas badidood waxa ay ahaayeen beeraley iyo xoolo dhaqato.
“Qofna nama doonayo. Dowlad iyo maamul inna rabtaa ma laha. Xitaa qaarkeen, ehelkooda baa cidleeyay,” ayuu raadiyo Ergo u sheegay Xuseen.
Mukhtar Cali Ishaaq oo ka mid ah dadka naafada ah ee magaalada Baydhabo ayaa codsaday in lagu caawiyo xarumo ay ku kulmaan, xirfadana ku bartaan. Mukhtaar wuxuu sheegay in dadka naafada ah u baahan yihiin in loo abuuro tababarro xirfado ay ku shaqeystaan sida farshaxanka, harqaanka, cilad bixinta qalabyada eletronikada iyo is-qurxinta haweenka oo ay sheegeen in ay u baahan yihiin haweenka nafaada ah iyo xaasaska ragga naafada ah.
Xirfadaha noocaas ah ayuu sheegay in ay dadka naafada ah ka caawin karaan in ay ku shaqeystaan oo ay nolol maalmeedkooda ka dabartaan, isla markaasna uga bixi karaan ciilka iyo isla hadlidda.
Muxiddiin Xusni/ MR/MRS
