Barakacayaasha deegaanka ka dhigtay hareeraha waddada isku xirka Muqdisho iyo Afgooye, gaar ahaan Ex control ayaa ka cabanaya gaadiidka isticmaala waddadaas oo isagoo xawaare ku socda mararka qaar qallibma, sidaasna ay dhibaatooyin kusoo gaarto guryahoodii, ayna ka dhalayo dhimasho tiro badan iyo dhaawac.
Muddo haatan laga joogo 4bilood, waxaa shil gaari oo xanuun badan uu ka dhacay kaam dacalka ku haya dhabbaha dheer ee laamiga ah ee ku dhaw Jaamacaddii Gahayr, ugu yaraan saddex qof ayaan aku dhimatay shilkaas.
“Xilli aan jiifnay ayaa waxaa gaari ka soo booday marsha biyoodka uu dusha ka koray laba carruur ah oo aan la joogay, mid ka mid ah maskaxda ayuu ka soo daadatay wuuna dhintay, halka midka kalana uu dhaawacmay”ayay tiri Shukri Aadan oo ah hooyada dhashay carruurtaas.
Darawallada isticmaala waddadaas ayaa dhanka kale u sababeynaya shilalka inay jirto aqoon darri dhanka kaxeynta gawaarida ah iyo waddooyinka oo xun, “Waxaa jira darawallo isaga shaqeysta oo quutul yowmkooda ka raadsada kaxeynta gawaarida, balse aan aqoon fiican u lahayn iyo waddooyinka oo burbursan isla markaana ciriiri ah.” Ayuu yiri Maxamed Cabdinuur Idiris oo ka mid ah darawallada gaadiidka xamuulka ee waddadaas isticmaala.
4tii Bishan gudaha kaamka jaamacadda Gahayr qarka laamiga meel ay ku sugnaayeen carruur ka kooban 5 kana soo jeeda hal qoys ayaa ku habsatay mashaqo, kadib markii gaari nuuca Blka uu jiiray, waxaana goobta ku geeriyooday 4 carruur ah halka midka soo harayna uu soo gaaray dhaawac culus.
Sidoo kale caruurta ku nool kaamamkaas ku yaalla duleedaka waddada ayaa halis ku jira, iyagoo qaarkood daba-qabsada gawaaridaasi kadibna ka dhaca. Iyo carruurta qaarkood oo biyaha ka soo dhaamiya meel laamiga dhinaciisa kale ah. Sida uu Ergo u sheegay guddoomiyaha kaamka Gaheyr, Yahye Aadan
Taliyaha ciidanka taraafikada Gen Cali Xirsi Barre (Cali Gaab) ayaa Ergo u sheegay inay jiraan shilal, laakiin ay wadaan dadaal lagu doonayo soo celinta adeegyada waddooyinka “Waan ognahay inay jiraan dhibaatooyinka shilalka, laakiin waxaan qorshaheeda wadnaa hagaajinta waddooyinka iyo koontaroolidda tayada darawallada kaxeeya gawaarida.” Ayuu yiri taliyaha.
Cabdulqaadir Maxamed Cabdulle/FM/MH
