Togagga waaweyn ee Dur-dur iyo Buuraan oo jihooyinka bari iyo koonfur ka xiga degmada Carmo ee gobolka Bari ayaa u xirmay dhowr jeer daadad xoog leh 72kii saac ee ina dhaaftay, xilligaasoo roobabka xilliga dayrta ay ka de’een Carmo iyo deegaannada buuralleyda ah ee gobolka Sanaag oo biyo-dhac ku soo sameeya togagga gobolka Bari.
“Qolyaha maamulka ayaa gaadiidka celinaya hadda, laba baabuur oo kuwa jaadka ah ayaa galay togga mid wuu la tagay, midna wuxuu ku jiraa biyaha dhexdooda, balse dadkii labada baabuur saarnaa booliska Carmo ayaa badbaadiyey” ayuu yiri Cabdiraxmaan cali oo gaadiidleyda ka mid ah oo aan la xiriirnay isagoo ku sugan togga Buraan ee koofurta Carmo.
Gaadiidka faraha badan oo maamulka degmada ay ku sheegeen ilaa 420 baabuur oo sida xoolo ay ka soo qaadeen dhulka Soomaalida Itoobiya, koonfurta dalka, gobollada dhexe iyo Puntland ayaa qayb ka ah gaadiidka socodkoodu hakadka galay, waxaa kaloo ku jira gaadiidkaas kuwo rakaab siday iyo kuwo adeegyo kala duwan u waday gobollada dalka oo ka soo baxay magaalada dekedda ah ee Boosaaso.
“Aniga xoolo ayaan sidaa, waxaan ka imid deegaanka Shillaabo ee dalka Itoobiya, waxaa gaariga saaran 353 neef oo Ari ah, saaka ayaa la rabay inaan rogno balse weli waxaan ku xanibannahay Carmo oo biyaha lama dhaafi karo.” Ayuu yiri Cabdiraxmaan.
Sayladaha xoolaha loo dhoofiyo dibbadda ee Boosaaso ayaa xilligan Carafadu dhowdahay mashquul ah, ganacsatada xoolaha ayaa walaac ka muujiyay jidadka aan wanaagsanayn ee gobollada qaarkood, gaar ahaan kan degmada Carmo oo ah mid halis badan xilliyada roobabka inay khatar ku noqdaan dhaqdhaqaaqii iyo suuqii xoolaha la dhoofiyo.
Axmed Muuse oo xubin ka ah ganacsatada waaweyn ee xoolaha dhoofiya ee Boosaaso ayaa Ergo u sheegay “Baabuurta xoolaha sida waxay ku ballansan yihiin xilli go’an inay keenaan xoolaha magaalada, sidaas ayaa annaga waxaan ula ballansannahay maraakiibta xoolaha dibadda u qaada, waxaa ku imaanaya dacfi iyo qiimo dhac neefka iibka ah haddii uusan helin cows iyo baaris caafimaad, waxaa laga yaabaa xitaa in loo waayo cid iibsata, ama in la helo cid qiimo jaban ku qaadata.”
Gaadiidleyda ayaa ka dalbaday maamulka iyo hay’adaha ka shaqeeya jidadka in wax laga qabto arrintan soo noq noqota ee togagga Buuraan iyo Dur-dur ee ku dhow degmada Carmo ee gobolka Bari, waxaa sabab looga dhigay isu socodka xirmaya buundooyin la’aan, sidaas waxaa noo sheegay maamulka degmada iyo darawallada baabuurta wata.
“Togga Dur-dur waa mid wayn marbaa 5 ilaa 6 maalmood baabuurtu ag-joogaan biyaha maraya oo badan darteed, dhowr jeer ayey horay u dhacday arrintan oo kale, markasta oo xilli roobaad ah waa la filan karaa, boolisku dhib badan ayey kala kulmaan ilaalinta gaadiidka iyo in baabuurta laga celiyo khatarta.” Ayuu yiri Yuusuf Cabdi taliyaha booliska Carmo oo Ergo la hadlay.
Gaadiidleyda waxaa rajo gelinaya hadda cagafyo waawayn oo ay maamulku ka soo qaadeen Boosaaso, kuwaasoo lagu furayo meel ay baabuurtu maraan oo toggaga ka mid ah, “ Cagafyo in la dhigo magaalada waan dalbannay dhowr jeer balse kama suurta gelin dhinaca dowladda, arrintaas haddii la helo degdeg ayaa loo caawin lahaa gaadiidka iyo isu socodka.” Ayuu yiri duqa degmada Carmo Ibraahim Shire.
Cabdiraxmaan Maxamed Xaaji/FM/MH
