Degmada Ceelwaaq ee gobolka Gedo ayaa markii ugu horreysay yeelaneysay garoon diyaaradaha ah, kaasoo laga dhisayo meel qiyaastii ilaa 2 km u jirta degmada, waxaana adeegsan doona diyaaradaha waaweyn ee qaada xamuulka iyo kuwa kaleba.
Garoonkan cusub oo dhismihiisa ay iska kaashanayaan maamulka degmada Ceelwaaq, dadweynaha degmada iyo barnaamijka cuntada QM u qaabilsan WFP ayaa baahida ugu weyn ee loo dhisayo ay tahay in lagu dardar geliyo howlaha samafalka, adeegyada bulshada sida ganacsiga iyo sfararada, maaddaama waddooyinka gobolka Gedo soo galay ay yihiin kuwo burbursan iyo kuwo ku xirmay dagaallada.
Cabdullaahi Buulle oo ka mid ah guddiga garoonkan ayaa Ergo u sheegay in dhererka garoonka uu yahay ilaa 2 km, halka balacana uu yahay ilaa 100 mitir, uuna faa`iido balaaran u leeyahay dadka gobolka.
“Garoonkani waxuu ahmiyad gaar ah u leeyahay bulshada ku dhaqan gobolka Gedo oo iyagu ka liita dhinaca isgaarsiinta, sida garoomada diyaaradaha iyo waddooyinka degmooyinka gobolka oo aad u bur bursan .” Ayuu yiri Cabdullaahi.
Sidoo kale Aadan Deerow oo ka mid ah odoyaasha degmada Ceelwaaq ayaa sheegay inay baahi weyn u qabeen garoonkan uuna wax ka beddeli doono nolosha dadka, isla markaana barakacayaasha gobolka ay fududaan doonto in gargaar la gaarsiiyo.
Gobolka Gedo ayaa ka mid ah gobollada dalka ee ay saameynta ugu badan ku yeesheen colaadihii dalka ka jiray sanadihii ugu dambeeyay, wuxuuna xad la leeyahay dalalka Itoobiya iyo Kenya, iyadoo ay ku nool yihiin kumannaan barakacayaal ah oo kasoo hayaamay abaaro iyo colaado deegaannadooda ka jiray.
Axmed Cumar Saalixi/FM
