Machadka tababarka xirfadaha gacanta ee SAACOM ee magaalada Garowe ayaa wuxuu siinaya fursado xirfadaha gacanta ah haweenka barakacayaasha ee ku nool Garowe. Machadkan oo la furay sanadkii 2003dii, ayaa waxaa si lacag la`aan ah wax uga barta haween badan oo danyar ah kuwaasoo u badan barakacayaasha ku nool Garowe iyagoo ka faa`iideysta xirfado kala duwan si ay iyagu iskood ugu shaqeystaan wixii halkas ay ka bartaa.
Machadka SAACOM oo xarumo kale ku leh deegaannada, Jalam, Godob jiiraan iyo Dhiganle ayaa waxaa haatan wax ka barta 250 haween ah da`doodu ay ka weyntahay 18sano, kuwaasoo ka faa`iideysta xirfadaha harqaanka, dharkarinta, cunta sameynta, cillaanka iyo qurxinta dumarka, dhar sameynta, iyo qurxinta guryaha.
Caasho Cabdi Xuseen oo ah maamulaha machadkan ayaa Ergo uga warrantay ujeeddada machadka “Waxaan rabnaa in haweenku ay wax bartaan, ugu yaraan xitaa inay bartaan qoraalka far Soomaaliga, inay bartaan xirfao ay ku shaqeystaan.” Ayay tiri Caasha.
Alaabta iyo dharka ay tolaan haweenkan ayaa loo iib geeyaa suuqyada Garowe, sidoo kale haween ka qalin jebiyay machadkan ayaa magaalada ka furtay xarun qurxinta dumarka ah, halka kuwo kalana ay furteen maqaayado ay cuntooyin ku kariyaan, sida ay Caasho sheegtay.
“Waxaan iska joogay guriga, sababtoo ah waalidkey ma awoodin inay iskuul i geeyaan, machadkan ayaan fursad u helay waxaan dhigtaa muddo 2 bilood ah, haddana waxaa farxad ii ah inaan magaceyga qori karo, muddo kaddibna aan abuuranayo shaqo ii gaar ah.” Sidaa waxaa tiri Xaliimo Xuseen Kaahiye, oo ka mid ah barakacayaasha xeryaha Jowle oo ku yaalla duleedka magaalada Garowe, isla markaana SAACOM wax ka barta.
Machadkan SAACOM oo tan iyo intii la furay ay ka qalin jebiyeen 1750 haween ah ayaa waxaa taageera ururrada haweenka ee gobolka Nugaal, iyadoo barnaamijka cuntada QM ee WFP uu haweenkan ku taageero raashiin bille ah oo ka kooban bariis, misir, digir iyo boorash.
Cabdiraxmaan Xaaji/FM/AM
