Qaar ka mid ah waaliddiinta dhalay carruur gabdho ah oo dhowaan lagu qabtay deegaannada maamul goboleedka Puntalnd oo la sheegay in loo tahriibinayay ka ganacsi ayaa beeniyay arrintaas.
Waaliddiintan oo beeralley ah kuna nool tuulada Xawaadleey oo hoos tagta degmada Balcad ee gobolka Shabeellaha Dhexe qiyaas ahaanna 75km dhanka waqooyi kaga beegan magaalada Muqdisho ayaa lasoo xiriiray Raadiyaha Ergo oo warka carruurtaas oo 5 gabdho ahaa ay ka dhegeysteen, iyagoo sheegay in gabdhaha ay u direen magaalada Boosaaso ee maamul goboleedka Puntland si ay ugu soo shaqeeyaan.
Maxamed Eenow Faarax oo ah aabbaha Jiijo Maxamed Eenow oo ka mid ah 5 gabdhood oo lagu hayo magaalada Garowe ee xarunta maamul goboleedka Puntland isla markaana adeer u ah Ruqiya oo iyadana gabdhahaas ka mid ah ayaa sheegay “Annaga ayaa dirsannay gabdhahaas iyo laba wiil oo qaraabada ah oo mid ka mid ah walaashey ayuu qabaa, midka kalana wuxuu la dhashay mid ka mid ah gabdhaha, marka waxaan caddeynayaa inaan gabdhahaas tahriib loo wadin,” Ayuu yiri Maxamed.
Booliiska Puntland ee magaalada Qardho ayaa bishii lasoo dhaafay gacanta ku dhigay 5 gabdhood iyo laba wiil oo ay ku eedeeyeen inay gabdhaha tahriibinayeen, waxaana lagu wareejiyay oo haatan gacanta ku haya wasaaradda haweenka iyo arrimaha qoyska Puntaland, halka labada wiilna lagu eedaynayo inay iyagu masuul ka ahaayeen tahriibinta carruurtaan.
Xuseen Xasan, oo ah sarkaal ka tirsan ururka muhaajiriinta caalamiga ah ee IOM xafiiskiisa Soomaaliya ayaa Ergo u xaqiijiyay in shanta gabdhood ay da`doodu u dhaxeyso 5 ilaa 14 jir.
Aabbe Maxamed Eenow ayaa sheegay in gabdhihiisa oo da`doodu ay kala ahayd 14 jir iyo 16 jir ay ku kalliftay inuu shaqo u diro duruufo dhaqaale oo qoyskiisa heysata “Waxaan nahay beeralley iska danyar ah, nacfi badan kama helno beeraha oo mararka qaar daadad ayaa kusoo fataha, shaqo la`aan ayaa ka jirta tuuladaan, noloshuna way iska adagtahay, marka waxaa naloo sheegay in magaalada Boosaaso ay ka jiraan fursado shaqo oo guryaha laga shaqeeyo ah oo gabdhaha ay qabtaan, waxaana u arkay inay taas tahay dakhliga keliya ee aan heli karno, sidaas daraaddeed ayaan gabdhaheyga ugu diray Boosaaso,” ayuu yiri Eenow.
Xijaas Barsanja Xaaji oo dhalay mid ka mid ah wiilashii waday gabdhahaas oo isagana ku sugan tuulada Xawaadley ayaa raadiyo Ergo u sheegay in wiilkiisa uusan gabdhaha tahriibineynin balse ay waaliddiintooda raaciyeen si ay u geeyaan magaalada Boosaaso.
Gabdhahan mid ka mid ah ayaa da`deeda lagu sheegay 5jir, haddii iyadana loo waday shaqo ama sabab kale, waxaa ka warramaya Xijaas “5 jir way ka yara roontahay, iyadana shaqo ayaa loo waday si wixii ay qaban karto reerka ugu soo shaqeyso.” Ayuu yiri Xijaas.
Cabdulqaadir Yuusuf Daahir, agaasimaha guud ee wasaaradda haweenka iyo arrimaha qoyska Puntland ayaa raadiyo Ergo u sheegay in gabdhahaas inta lagu wareejinayo waaliddiintooda ay wasaaraddu gacanta ku heyn doonto.
Eenow ayaa sheegay in inkastoo ay weli heysato duruuftii uu gabdhihiisa u dirsaday, haddana mar ay la xiriireen maamulka Puntalnd loo sheegay inay soo dirsadaan qarashka lagu soo celin lahaa “Waxaan ka codsanayaa maamulka Puntland iyo hay`adaha gargaarkaba inay gacan nagu siiyaan in gabdhaheenna iyo wiilashii wadayba naloo soo celiyo, ma heysanno qarash aan dib ugu soo celinno halkaan.” Ayuu mar kale yiri Eenow.
Inkastoo ay qoysaska carruurtan ku doodayaan in carruurtooda ay u dirsadeen shaqooyin, haddana shuruucda shaqaalaha caalamiga ah uma oggolaanayso in carruurtu ay ku lugyeeshaan shaqooyin, in qoysaskooda laga kaxeeyo, in halis la geliyo naftooda iyo waddooyinka magaalooyinka la isaga tago- badanaa marka ay da` yar yihiin.
Abdulkadir Abdulle/Cabdiraxmaan Xaaji/FM
