Maraakiibta NATO oo ku sugan badda Soomaaliya ayaa 27kii-30kii bisha Maarso waxay gargaar caafimaad u fidiyeen 147 qof oo ku nool magaalda Hobyo.
Maraakiibtan oo ka mid ah maraakiibta halkaas u jooga iney ka hortagaan falalka burcad-badeedda Soomaalida ayaa waxay baroosinka soo dhigteen magaalada Hobyo. Adeegyadaan caafimaad waxaa fuliyey takhaatiir Talyaani ah oo ka mid ah kuwa la socda maraakiibta NATO, iyadoo ay ka faa’iidaysteen dadka reer Hobyo siduu Ergo u sheegay duqa degmada Hobyo Maxamuud Cawaale “Markaan aragnay dhibaatada dhinaca caafimaad ee ka jirta Hobyo ayaan la xiriirnay ciidamadda NATO, si ay nooga caawiyaan arrimaha caafimaadka, weyna noo yimaadeen, wax qarsoonna ma ahan, Hoybo muddo dheer ayey dadkeedu la il darraayeen dhibaatadda cafimaad darro iyo tacliin xumo ee jirta”
Cali Baashe Macalin Abitidoon oo ka mid ah dadkii ka faa’iidaystay adeegaan cafimaad ayaa isaguna yiri “Anniga waxay iga daweeyeen xanuun dhinaca kelida ah oo I hayey, waxay igu sameeyeen badhitaanno dhinaca computerka ah, kadib daawo ayey ii qoreen”.
Xanuunnadda ugu badan ee dadka bukaanka ah laga daaweeyey ayaa ahaa, keliyaha, burooyin iyo xanuuno kale, siduu sheegay dakhtar Makaahiil Axmed Maxamed oo ah dhakhtar reer Hobyo, gacanna siinayey dhakhaatiirta NATO, wuxuuna Ergo u sheegay in dadkan dawada helay ay ka kala yimaaddeen deegaanno badan oo gobolka Mudug iyo Galgaduud ka tirsan sida Xarardheere.
Hooyo Maryam Axmed oo ilmo yar oo laba sano jira looga daaweyey xanuun madaxa biyo kaga jireeen ayaa Ergo u sheegtay in muddo hal sanno ka badan uu ilmaheedu xanuunsanaa ayna geysay goobo caafimaad oo guddaha ah, daawooyinkay u qoreenna aysan waxba u tarin.
Magaalada Hobyo waa magaalo qaddiim ah oo ay badmareennadu ugu soo leexan jireen iney ku nastaan biyona ke helaan, waana sida ay taariikhdu sheegeyso magacaas Hobyo wuxuu ka yimid (Hoo biyo), muddooyinkan damabese Hobyo waxay ka mid noqotay xarumaha ay burcabadeeddu ay hogyga ka dhigteen, waxayna magaalada caasimadda ah ee Muqdisho u jirtaa masaafo dhan 510Km, waxaana ku nool dad lagu qiyaasay 12,000 oo qof.
Dhamaad.
GW/MH
