Dadka ku nool tuulooyinka ku teedsan webiga Shabeelle ee degmadda Jawhar ayaa sheegaya inay la soo deristay cabsi ay ka qabaan inuu soo fataho webiga, iyadoo qararka webiguna jilicsan yihiin, heerka biyaha webigana ay kor u kacayaan.
Webiga Shabelle ayaa doraad ka fatahay deegaanak Tuwaarey oo u dhow degmadda Jawhar isagoona khasaare u geystay dhul beereed badan, inkastoo markiiba laga hortegey arrintaas. gudoomiyaha tuulada Tuwaray Cali Maxamed Xaaji ayaa Ergo u sheegay in 1500 oo hictar oo beero ah oo hadda tabcannaa uu webiga ku fatahay, dadkii tuladuna ay barakaceen oo waxay u guureen meel taag ah oo dhinaca Jawhar .
Gudoomiyaha gobolka Shabellaha Dhexe Cabdi Jiinow ayaa Ergo u sheegay isagu in ilaa 9 goobood oo webigu ka jilicsan yahay ay khatar ugu jiraan inuu webiga ka fataho, waxaana kaluu sheegay inaysan waqtigaan ka jirin Jowhar wax hay’ado ah oo caawiya dadka kana hawl gala halkaas, iyadoo welina xaaladaha amaanku aysan adkayn.
Daahir Muuse Jiisow oo ah Mudane ka tirsan baarlamaanka Soomaaliya kana soo jeeda degmada Jawhar ayaa tagay sabtidii la soo dhaafay deegaankaas ayaa Ergo u sheegay in khatarta fatahaadda webiga shabeelle ee agagaarka Jawhar tahay khatar weyn, haddaan sagaalka goobood ee hadda u ka jilicsanyahayna aan carro tuur lagu samayn ay ka dhalanayso masiibo. Mudanahaan ka tirsan baarlamaanka ayaa sheegay inay tahay in dadka deegaanka, dawladda iyo hay’addaha gargaarku iska kaashadaan ka hortegista arrintaan.
Mashruuca SWALIM oo ka shaqeeya arrimaha saadaasha hawadda Soomaaliya oo ka tirsan hay’adda cuntadda iyo beeraha qaramadda midoobay ee FOA ayaa saadaashiisii ugu dambaysay ku sheegay in heerarka webiyada Jubba iyo Shabelle ay kor u kacayaan, ayna dhici karto fatahaado, iyadoo ay ka da’een dhulalka sare ee Itoobiya roobab laxaad leh labaddii todobaad ee la soo dhaafay.
Maryan Abdi/MH
