Kadib kulan ay wada qaateen warbaahinta iyo maamulka Puntland ayaa waxaa la amray in la fasaxo sadex idaacadood oo maamulka Puntland uu ka joojiyey shaqadii baahinta kuwaasi oo hawada ka maqnaa labadii maalmood aynu soo dhaafney. Idaacadahaan oo kala ah radio Daljir,Codka Nabada iyo One Nation radio ayaa dib u bilaabey shaqooyiinkooda galabnimadii shaley kadib ogolaansho ay ka heleen wasaarada warfaainta Puntland.
Wasiirka warfaafinta Puntland Maxamuud Ceydiid Dirir ayaa ku tilmaamey ujeeddada loo xirey idaacadaha Daljir,Codka Nabada iyo One Nation radio kadib markii ay joojin waayeen baahinta idaacado ku yaaal dalka dibadiisa kuwaas oo kala ah radio Ergo oo ka shaqeeya arimaha bini’aadanimada iyo radio Hiirad oo tababarro siiya wariyeyaasha Soomaalida fadhigiisuna yahay magaalada Hargeisa iyo Radio Bar-kulan. Wasiirka warfaafinta Puntland ayaa ku adkeystay in aysan marnaba ogolaandoonin in idaacadahan laga baahiyo kuwa ku yaal gudaha deegaannada Puntland inta ay oggolaansho ka helayaan wasaarada warfaafinta.
Ururrada u dooda xuquuqda saxaafadda ee Soomaaliya ayaa si kulul u cambaareyey amarka ka soo baxay wasaaradda warfaafinta Puntland ee lagu joojiyey idaacadaha Ergo, Hirad iyo Bar-kulan. Burhaan Axmed Daahir waa Gudoomiyaha Ururka Suxufiyiinta Qaranka Soomaaliyeed ee NUSOJ ahna Xoghayaha Ururka Suxufiyiinta Puntland ee MAP ayaa sharci darro uu ku tilaamey amarka wasaarada warfaafinta Puntland kaasoo uu sheegay in aysan meelna uga qorneyn sharciga warbaahinta Puntland ee Low Number 5.
Hadal heynta ugu badan ee deegaannada Puntland ayaa noqotey amarka ka soo baxay wasaarada warfaafinta Puntland ee lagu joojiyey idaacadaha Ergo, Hirad iyo Bar-kulan oo ay si weyn ugu xirnaayeen dhageystiyaal fara badan, bulshada ku nool gobolka ayaa ka codsadey maamulka Puntland in uu ka fiirsado tillaabada uu ku joojiyey Radio Ergo oo soo gudbiya macluumaad ku saabsan arrimaha bini`aadannimada.
Si kastooy ahaataba waxaa muuqanaya dhalliilo loo jeedinayo maamulka Puntland taas oo la xiriirta joojnta idaacadaas, mana ahan markii ugu horreysay ee maamulka Puntland loogana codsanayo iney tillaabadaas wax ka beddesho.
Axmed Somali/AM/MH
