Fallis: Waxaa qaraxan ku dhintay 8 qof oo uu ku jiro wiilkaygii curadka ahaa, aabahay, hooyaday iyo intii ila dhalatay oo dhan.
Dagaallada iyo colaadihii Soomaaliya waxay saamayn ku yeesheen dhammaan dhinacyada bulshada, waxaana ku batay khatarta deegaanka, iyadoo goob kasta oo waddanka ah aad ku arkaysid haraadiga hubka, kuwo qarxay iyo kuwo aan weli qarxin.
Fallis Cali Sahal Cilmi waxay ahayd fannaaniintii cusbaa ee ka soo baxay Muqdisho sanadihii ugu dambeeyey, waxayna ka mid tahay tiro aan weli si xaqiiq ah loo ogaan oo ay naafeeyeen qaraxyada, dagaallada iyo haraadiga hubka loo isticmaalayo colaadaha Soomaaliya ka taagan muddada ka badan 20ka sano, Felis qarax sanadkii 2007dii ku haleelay Muqdisho jidadkeeda mid ka mid ah ayaa ka dhigay naafo ay ku wayday labadeedii lugood, ilaa haddana dhawacyadii qaraxaasi ayey la bugtaa, waxayna Fallis Ergo uga sheekaysay sidii ay wax ugu dhaceen.
“Waxaan degganayn xaafadda suuq bacaad, markii dagaalku ka socday gudaha Muqdisho sanadkii 2007dii, Bishii May, annigoo markaas ka qaxaya dagaalka socday, ayaan soo raacnay gaari aan ku barakacaynay aniga iyo qoyskaygu, waxaan gaariga ku saarnayn 9 qof oo aan isku qoys ahayn, miino dhulka ku aasan ayaa gaarigeennii la kacday, aniga waxaan miyirsaday afar maalmood ka dib anigoo isbitaal Keysanay ku jira, anigoo xubnahaygii qaar maqan yihiin.
Waxaa qaraxaan ku dhintay 8 qof oo aan isku qoys nahay oo uu ku jiro wiilkaygii curadka, aabbahay,hooyaday iyo intii ila dhalatay ayey ahaayeen. Waxaa la ii qaaday Jabuuti si la iiga soo daaweeyo dhaawacyo aad u daran oo i soo gaaray, waxaanan ogaaday in qoyskaygii ay miinadaas ku dhammaadeen afar bilood kadib.
Waxa ila dhashay, waalid iyo cid ii qoys ah manta dunida kuma noola dhammaantoodna qaraxaas ayey ku dhamaadeen, anigana labadii lugoodba waa la iga jaray, ilaa haddana xanuunkii waa isii hayaa, dhaawiciina weli kama bogsan”.
Fellis oo sheekadeeda tiirannyada iyo caloolyowga badan sii wadata kana warrameysa sida ay hadda u nooshahay ayaa waxay tiri: “Waxaan hadda noolahay buush ku yaalla Tarabuunka, mana haysato cid i taakulaysa, waxaan ka dawarsadaa ayey tiri jidka oo aan fariisto, waxaan dareemayaa murugo badan, siiba marka xanuunku i qabto, waxaan raadiyaa xanuun baabi’iye anigoo gurguuranaya”
Fallis oo soo xusuusanaysa xilligii laxaadkeedu u dhamaa, iskana shaqeysan jirtay ayaa waxay ka warrameysaa sida waqtigaas xaalkeedu ahaa”Horay waxaan uga shaqayn jirey hab fannaan, oo aan ka mid ahaa fannaaniintii Muqdisho ka soo baxay intii buruburku jiray, sidoo kale mar waxaan ahaa dukaanle, hadda waxaan ahay naafo, waxna ma qaban karo, welina wax i taakuleeyo ma helin”
Ugu dambeyntii waxay Fallis codsaneysaa in laga taakuleeyo sidii ay u heli lahayd caafimaad dheeraad ah, iyadoo sheegtay inay u baahantahay qalliin, lugtayda meeshii laga gooyey weli dheecaan ayaa ka socda mana bogsan, waxayna intaas ku dartay inay goob kula nooshahay hooyoyin ilaa saddex ah oo iyana ay naafeeyeen qaraxyo haleelay, marka qofku lixaadkiisa waayana uu yahay qof aad murugsan, nolosha dhinacyadeeduna ku adkaato ayey hadalkeedii ku soo koobtay Felis.
AA/MH/AM
