Wabiga Shabeelle ayaa fatahaad ka geystay qeybo ka mid ah gobolka Shabeellaha dhexe, xilligaan oo roobbakii Guga ay ka billowdeen halkaas.
Tuulada Maandheere oo 17 km koofur bari kaga beegan magaalada Jowhar ee xarunta gobolka Shabeellaha Dhexe ayuu wabigu ku fatahay, isagoo gooyay dhulbeereedyo ay ka baxayeen dalagyada sisinta, galleyda, digirta iyo noocyo khudaar ah, sida uu Ergo u sheegay Jeylaani Macallin Yuusuf oo ah guddoomiyaha degmadaas.
“Qiyaastii 100 Hiktar oo dhulbeereedyo ah ayuu wabigu burburiyay, wuxuuna wabigu kusuu socdaa bartamaha tuuladan, sidoo kale dad aan qiyaastooda heynin ayaa barakacay.” Ayuu yiri Jeylaani.
Tuulada Tugaarrey oo 18km dhanka bari kaga beegan magaalada Jowhar kana mid ah tuulooyinka wabigu fatahaadda ka geystay toddobaadkii tegay ayaa waxaa daadka raacay dhul beereedyo, kadib markii ay fatahday buqda ugu weyn tuuladaas, sida uu Ergo u xaqiijiyay guddoomiyaha tuuladaas.
“Dhulbeereedo gaaraya 1500 Hiktar oo tacban ayna ka baxayeen dalagyada sisinta, galleyda iyo digirta ayaa daadka raacay, waxaa jira dhulbeereedyo kale oo aan tacbaneyn oo ay biyuhu fadhiyaan, taasna waxay niyad jab ku abuurtay beeralleyda ku dhaqna tuuladan oo ah dad danyar ah kuna tiirsanaa waxa ay ka goostaan beerahooda.” Sidaa waxaa yiri Cali Maxamed Xaaji, oo ah guddoomiyaha tuulada Tugaarrey.
Maamulka gobolka Shabeellaha dhexe oo gacan ka helaya qaar ka mid ah ganacsatada tuuladaas ayaa ku guuleystay inay xiraan buqda fatahday ee Tugaarrey, balse waxaa jira fatahaado kale oo laga cabsi qabo in wabigu ka geysto tuulooyin hor leh.
“Xilli roobaadkaan Guga mar walba wabiga Shabeelle wuu fatahaa, inkastoo aan xirnay buqda Tugaarrey, haddana waxaa jira 9 buq (Meelaha jilicsan ee qarka webiga) oo kale oo laga cabsi qabo inay fatahaan, waxaan ka codsaneynaa dowladda Federaalka iyo hay`adaha arrimaha beeraha ku shaqada leh inay naga caawiyaan ka hortagga fatahaado kale oo wabigu uu geysto.” Sidaa waxaa yiri guddoomiyaha gobolka Shabeellaha Dhexe, Cabdi Jiinow Calasow.
Hay`adda QM u qaabilsan cunnada iyo beeraha ee FAO ayaa xaqiijisay in heerka biyaha wabiga Shabeelle ay kor u dhaafeen 5.00m, taasoo qarka u saaran inuu karkaarrada jabsado.
Maryan Sheekh Cabdi/FM
