Waxaa ka bilowday magaalada Luuq ee gobolka Gedo olole nadaafadeed oo ay soo abaabuleen haweenka deegaankaas. Ololahan ayaa kallifay ka dib markii ay roobab badan halkaas ka da`een kuwaasoo keenay nadaafad darro iyo meelo biyo fariisad ah kuwaasoo laga baqayo iney keeneen cudurro ay ka mid yihiin duumada.
Ololahan oo socday muddo shan maalmood ah ayaa wax looga qabtay in la nadiifiyo meelo badan oo ka mid ah degmada Luuq, si gaar ahna waxaa muhimad loo siiyay xeryaha barkacayaasha ay deggan yihiin ee ku yaal Luuq kuwaasoo u muuqday fayo-dhowrkoodu mid aad u liita sid ay u sheegtay raadiyo Ergo Faadumo Muxumed Cabdille oo ah Gudoomiye ku xigeenka Ururka Haweenka ee degmada Luuq.
“Meelaha ugu daran ee aan ololaha nadaafadeed ka fulinnay waa suuqyada, hareeha webiga, goobaha caafimaadka, waddooyinka, meelaha baabuurta lagu dhaqo iyo weliba si gaar ah xeryaha ay ku jiraan dadka Barakacayaasha ah” ayay Faadumo tiri
Faadumo iyadoo ka warbixineysa sababta keentay xilligan in hawshaasu nadaafadda la fuliyo by tiri “Markii la arkay khatar caafimaad oo ka dhalna karta deegaanka ,maadama deegaanka mudooyinkii ugu dambeeyeyba ay si is daba joog ah ugu da`ayeen roobab culus, iyo xeryahay barakacayaasha oo ay ku nool yihiin dad jilicsan oo u baahan in gacan laga siiyo dhinaca faya-dhoworka taasoo keentay iney haweenku iskood isu abaabulaab oo hawhsan iyagu furliaan”.
Cabdi Daahir Aaden oo ah gudoomiyaha xerada barakacayaasha ee Alla-Amin ee ku Duleedka Luuq ayaa uga mahadceliyay dadaalkaas ay sameeyeen haweenka Luuq, wuxuuna ka dalbaday dhammaan dadka kale iney iyagun ka gargaaraan arrimahan nadaafadda iyadoo iminka ay jiraan roobab biyo badan wata oo dhibaato sababi kara.
Haweenkani ayaa ugu dambeentii waxay codsi u jeediyeen maamulka degmada Luuq inuu la dhowro goobaha ay nadiifiyeen oo aanan dib loogu soo shubin qashin iyo waxyaabo kale.
Demada Luuq oo ka tirsan gobolka Gedo ee dalka Soomaaliya ayaa sanaddii 2012kii u soo qaxay dad badan oo ka soo hayaamay gobollada Bay, Bakool iyo Jubbada Dhexe markii ay abaar daran meelahaasi ay ku dhufatay. Tiro qiyaas ah oo ay UNCHR ka soo saartay dadkii ku soo barakacay Luuq waxay ku sheegtay 16,380 qof oo iyagu labadii sano oo u dambeysay halkaas ku ahaa barakacayaal, waxayna u badan yihiin dumar iyo carruur.
Omar Saalixi/AM
