Gaadiid fara badan oo ah kuwa xamuulka qaada oo ku kala wajahnaa gobollada Gedo iyo magaalooyin ka tirsan gobolka waqooyi bari ee Kenya ayaa waxey ku xayiran yihiin waddooyinka xiriiriya gobolka Gedo iyo deegaannada xudduudaha Kenya iyo Soomaaliya, taasina ay keeneen roobabka faraha badan ee halkaas ka da`ya.
In ka badan 80 gaari ayaa ku xarian halkaas muddo ka badan 15 cisho ayaa wada adeeg kala geddisan oo ay dadku u baahan yihiin sida raashin, dawooyin, dhar iyo waxyaabo kale oo daruuru u ah bani`aadamka, weliba kuwa deggan deegaanknada ku teedsan xuduudaha oo dekaduhu ay aad uga fog yihiin.
Darawallada gaadiidka qaarkood oo telefoonka ugu warramay raadiyo Ergo, ayaa sheegay in meelo kala geddisan ay gaadiidyku ku xayiran yihiin sida Qansaxdheere iyo Buurdhuubo oo ka mid ah deegaanka Gedo , sidaas si la mid ahna ay jiraan kuwo kale oo iyaguna ku xanniban deegaanka Miido oo ka tirsan Awdiinle iyo inta u dhaxeysa Ceelwaaq iyo Ceelcade oo ka tirsan Gedo.
Cabdulqaadir Jeemis oo ka mid ah darawalladaas ayaa sheegay in gaadiidka ay wataan ee xamuulka ah in ay u rararn yihiin ganacsato ku kala sugan degmooyinka Ceelwaaq, Ceelcade, Garbahaarrey iyo kuwa kale oo u rararn degmooyin ka kala tirsan gobolka Waqooyi Bari ee dalka Kenya, wuxuuna intaas raaciyay in roobabka xooggan ee da`aya awogood in ay ku adag tahay in ay gaaraan deegaanadaasi, sidaas si la mid ahna
Hakadkan ku yimid gaadiidka ayaa keenay in qiimaha raashiinku sare u kaco, gaar ahaan deegaanno ka tirsan gobolka Gedo iyo magaalooyinka ku teedsan xuduudka Kenya iyo Itoobiya oo badi noloshoodu ku xirnayd ganacsiga ka yimaada Muqdisho sida uu radiyaha ERGO u sheegay ganacsade Muqtaar Cabdi Xasan oo ka mid ah Ganacsatada Ceelwaaq.
Dalka Soomaaliya ayaanan wax dayactir ah lagu sameyn waddooyinka sidii ay dawladdii Dhexe meesha uga baxday muddo haatan laga joogo 22 sano, taasoo keenta mar walba xilliyada roobabka iney waddooyinka oo dhan noqdaan meel aanu gaadiidku mari Karin, waxaana markaas dhacda in gobollo badan oo kala adeegan jiray ay kala go`aan, maciishadahana ay kor u kacaan, dhibaatadanna waxay iska noqotay mid joogta ah oo la fisho xiilliyada roobabku yimaaddaan.
Salixi/AM
