Booliska Puntland ayaa 5 carruur ku qabtay kontoralka magaalada Qardho dabayaaqadii toddobaadkii hore, kawaasoo la tuhunsan yahay in loo waday ganacsi, waxayna booliisku arrintaas u qabteen laba nin oo iyagu carruurtaas safrinayay.
Sida uu idaacadda Ergo u sheegay Xuseen Xasan oo ah sarkaal ka tirsan xafiiska hay`adda IOM ee Soomaaliya carruurtan ayaa waxay da’doodu u dhaxaysaa 5 sano ilaa 14 sano, dhammaantoodna waa gabdho.
Shantan carruur iyo labadaas nin oo la socday ayaa markii dambe waxaa la wareegay laamaha dambi baarista ee maamulka Puntland, kuwaasoo si toos ah u xaqiijiyay in carruurtan ay yihiin dad la doonayey in laga ganacsado, isla markaasna qoysaskoodii looga soo kaxeeyey in laga shaqaalaysiinayo magaalada Boosaaso.
Wasaaradda haweenka Puntland ayaa lagu wareejiyay gacanta ku haynta carruurta iyadoo la dejiyey guri ku yaalla magaalada Garoowe si halkaas loogu xannaaneeyo, iyadoo kaashanaysa hay`adda muhaajiriinta caalamiga ah ee IOM.
Cabduqaadir Yuusuf Daahir oo ah agaasimaha guud ee wasaaradda haweenka ee Puntland ayaa idaacadda Ergo u sheegay inay carruurta xaaladdoodu caafimaad tahay mid wanaagsan, ayna xannaanaynayaan inta dib loola mideynayo qoysaskooda.
Xuseen Xasan oo ah saraal ka tirsan Hay`adda IOM oo isna Ergo la hadlay ayaa xaqiijiyey inay hay`addadoodu ogaatay in carruurtan laga ganacsanayay ka dib baarista ay sameeyeen laamaha Amniga oo arrintaasi u kuur galay iyo khubarro ka tirsan Hay`addooda.
Xuseen Xasan ayaa sheegay in hay`adda isku xirta qoysaska kala lumay ay la kaashanayaan sidii carruurtan dib loola mideyn lahaa qoysaskooda, oo uu sheegay inay ogaadeen inay ku nool yihiin deegaanka Xawaadley ee gobolka Shabeellaha Dhexe ee dalka Soomaaliya.
Sarkaalkan ayaa sheegay in dalka Soomaaliya ay ka jiraan kiisaska ka ganacsiga dadka iyo dhoofinta sharci darrada ah, wuxuuna tilmaamay in maamulka Puntland iyo hay`adda IOM ay si wadajir ah uga wada shaqeynayaan mashaariic lagu tababarayo laamaha ay arrimahan khuseeyaan si wax looga qabto.
Carruurta ku nool Soomaaliya ayaa qaba halis noocyo badan isugu jirta oo ka dhalatay dagaallada, barakaca, saboolnimo iyo xanuunno.
Cabdiraxmaan Xaaji/ MG//FM/AM
