Wasaaradda arrimaha dibadda ee Maraykanka ayaa sheegtay inay aad uga walaacsan tahay go’aanka maxkamadda Muqdisho ay ku ridday xukun hal sano ah haweenay 27 jir ah oo dhibane u ahayd kufsi iyo wariye wareysi ka qaaday.
Dacwada labadan qof ee xukunka lagu riday ayaa waxa ay ka dhacday magaalada Muqdisho shalay, tanoo keentay in ay jawaabo dareen leh ka bixiyaan qeybaha bulshada, ururrada u dooda xuquuqda aadanaha, dawlado iyo ururrada xoriyadda saxaafadda.
War qoraal ah oo ka soo baxay wasaaradda arrimaha dibadda ee Maraykanka ayaa lagu sheegay inay ka walaacsan yahiin habka garsoor ee dacwaddaas la marsiiyay, iyadoo sheegtay in markhaatiyaasha kiiskana loo caga jugleeyey intii dacwadda xukunka uu socday.
Afhayeen u hadlay wasaaradda arrimaha dibadda Mareykanka Victoria Nuland ayaa sheegtay in tixgelinta xuquuqda haweenka iyo xoriyadda warbaahinta ay tahay mid aasaasi ah, xaqiijinaysana in Soomaaliya ay hesho horuumar wanaagsan, deganaansho iyo dimuquraadiyad .
Victoria Nuland ayaa intaas ku dartay in loo baahanyahay in haweenka ay helaan cadaadalad hadii loo geysto kufsi iyo tacadiyo kale oo ka dhan ah jinsigooda, iyagoo aan qabin baqdin. Waxa ay sheegtay in loo bahan yahay in Soomaaliya ay xaqiijiso xoriyadda weriyayaasha si ay howlahooda ugu gutaan si aan cabsi iyo dhibaatayn lahayn.
Mareykanka ayaa sheegay in maxkamadayntii shalay ay tusaale cad u tahay hannaanka garsoor ee Soomaaliya iyo dastuurka qaranka, xukunkaan ay gaartayna waxay farriin khaldan u siinaysaa kuwa caadaystay inay geystaan tacaddiyada haweenka iyo dhibaatayntooda. Waxaana ay ugu baaqeen dawladda Soomaaliya in inay ilaaliso dastuurka oo qeexaya tix gelinta xoriyadda warbaahinta, xuquuda haweenka iyo hannaanka sharciga.
Ra`iisal wasaaraha Soomaaliya Saacid Shirdoon ayaa ku dhowaaqay isagu in guddiga madaxa banana ee xuquuqda aadanaha Soomaaliya oo dawladdu dhowaan magacawday ay baari doonaan kiiska, laakiin waxaan u sheegaynaa dawladda Soomaaliya inay arrintaan si dhakhso leh tallaabo uga qaaddo ayna ilaaliso xuquuqda aadanaha iyo habsami u socodka sharciga.
MH/MG
