Waa sidee nolosha dadka degan degaannada iyo degmooyinka isku xira muqdisho iyo Marka? Dhawaan waxaa socdaal ku soo maray deegaannadaas oo muddo badan ay camimnaayeen boqolaal kun oo barakacayaal ah wariyeheena Yusuf Keynaan.
Degaannadii u dhaxeeyay Muqdisho iyo Afgooye ee ay kol hore aad u camireen boqolaal kun oo barakacayaal ah, oo badankood ay ku soo barakaceen rabshadihii ka jiray Muqdisho ayaa waxaa ay haatan yihiin dhul haawanaya oo la oran karo waa laga wada guuray.
Dhulkan, muddo sanad ka hor waxaa uu xitaa ka bulsho badnaa Muqdisho, waxaa ka jiray waxyaabaha aasaaska u ah nolosha sida goobo ganacsi, waxbarasho, isbitaallo iyo nooc kasta oo nolol ah oo kale. Hadda waxa kaliya ee ay indhahaagu qabanayaan waa burbur xooggan , waxaana aad arkaysaa goobihii buushashkii ahaa oo isku dumay, albaabbo lala baxay, iyo daaqado jajaban oo gudahooda ay kaaga dhex muuqanayaan dhagxaan iyo jiingado.
Degmada Afgooye oo kamid ahayd goobihii aan socdaalka ku maray ayaa ay u muuqatay mid ka yara camiran Ceelasha biyaha, waxaana dad degan magaaladan ay ii sheegeen in xaaladaha ammaan iyo tan ganacsi ay yihiin kuwa ka soo raynaya.
Markii aan horey u sii qaadnay waddada isku xirta Afgooye iyo degaanka Shalanbood oo duleedka ka ah magaalada Marka waxa u dhexeeya qiyaastii 60km waana degaanka leh beeraha ugu badan gobalka shabeellada hoose, waxaa ku yaala tuulooyin badan oo hadda haawanaya, waxaana sida la ii sheegay dadka degganaa tuulooyinkaas ay ahaayeen dad reer guuraa ah xoolahoodiina ay la guureen.
Magaalada Marka oo ah magaalo da’weyn, lagu yaqaannay taariikhdeeda kalluumaysiga ayaa laf ahaanteeda in kastoo ay hadda deggan tahay waxa aad mooddaa in horuumar badan uusan ka jirin. Waxaana ay dadku ii sheegeen in magaalada wali ay ka maqanyihiin dad badan oo horey uga qaxay xilliyadii ugu dambeeyay.
Dadka goobaha aan maray ayaa waxaa dhamaantood ay ii sheegayeen in aysan danaynayn siyaad balse ay doonayaan ammaan iyo in ay noloshooda u sii wataan iyagoo aan la dhibaatayn.
Yusuf Keynaan/MG/AM
