Wadayaasha gaadiidka ka shaqeeya gobolLada Puntland ayaa cabashooyin xooGgan ka muujiyey go’aan ay dhowaan dowladda Puntland ku joojisey shidaalkii uga imaan jirey dalka Yeman.
Gaadiidleyda ayaa idaacadda Ergo u sheegay in shidaalkaas oo qiimihiisu ka yaraa shidaalka ay keenaan shirkadaha ganacsiga uu ka caawin jiray in howlahooda shaqo ay u wataan si caadi ah, ayna noloshooda ka soo saartaan.
Magaalada Boosaaso iyo degmooyin kale oo k amid ah Puntland labadii maalin ee lasoo dhaafey ayaa waxaa la arki karay iyadoo kaalmaha shidaalka lagu iibiyo ay inta badan xiran yihiin.
Fuustada shidaalka oo markii hore lagu iibsan jirey kaalmaha shidaalka $160, ayaa hadda gaartay lacag dhan $200.
Shidaalkan laga keeno dalka yemen ayaa ah kuwa shushubka, iyadoona qarash ahaan uu ka jabanyahay shidaalka laga keeno dalka Imaaraatka Carabta. Dadwaynaha ayaa si weyn u iibsan jiray shidaalka qarashka yar.
Maamulka Puntand wax hadal ah kama soo saarin cabashadaasi sara u kaca qiimaha shidaalka, lamana oga sababta uu maamulku u joojiyay shidaalkii laga soo dhoofin jiray Yemen.
Kasokow qiima kororka shidaalka, waxaa jira caqabado kale oo darawallada Puntland ka shaqeeya ka haysta waddada laamiga ah ee soo gasha magaalada Boosaaso oo qeybo badan oo ka mid ah burbursan, kaddib markii roobabkii bishii Oktoobar ee sanadkii hore ka da’ay gobolka Bari ay sababeen daadad ku soo rogmaday.
Axmed Somali/MG/FM
