Qaar ka mid ah dugsiyadii ku xirmay codaalaha gobolka Gedo ayaa dib u howl billaabay, kaddib markii ay soo hagaagtay xaaladda ammaan ee qaar ka mid ah degmooyin iyo tuulooyin ay saameeyeen dagaallo gobolkaas ka jiray.
Sida ay xaqiijiyeen maamulayaasha iyo waalidiinta dugsiyo waxbarasho oo ku yaalla Ceelwaaq, Buusaar iyo Ceelcadde, ardayda ayaa dib u billaabay inay dhigtaan duruustooda.
Ugu yaraan ilaa 1760 ardey oo isugu jira wiilal iyo gabdho ayaa lagu soo warramayaa inay dhiganayeen dugsiyadaas. Tusaale ahaan ilaa 500 oo ardey oo isugu jira wiilal iyo gabdho oo wax ka barta degmada ceelwaaq ayaa ka mid ah ardaydaas, sida uu raadiyaha Ergo uu ugu warbIxiyey Cabdiwaaxid Maxamuud Fadhiid oo ah madaxa dugsiyada waxbarashada degmada Ceelwaaq.
Sidoo kale Cabdi Macallin Aaden oo ah maamulaha dugsiga H/Dhexe ee tuulada Buusaar ayaa sheegay in sanadkaan ay wax iska baddelayaan ka qeybgalka ardayda ee dugsiyada oo tiro ahaan gaartay ilaa 450 ardey.
Dugsiga H/Dhexe iyo Sare ee deegaanka Ceelcadde ayaa ka mid ah goobihii ay sida xun u saameeyeen colaadaha, waxaana sida uu sheegay maamulaha dugsigaas ku soo laabtay ilaa 514 ardey iyo macalimiin gaaraysa 14 macallin.
Dugsiyada waxbarashada, goobaha caafimaadka iyo waddooyinka ayaa ka mid ah goobaha arrimaha bulshada oo ay ragaadiyeen colaadaha gobolkaas ku dhex marayay ciidamada AMISOM, kuwa dawladda iyo Alshabaab.
Axmed Cumar Saalixi/MG/FM
