Hayádda caalamiga ah ee ICRC ayaa sheegtay inay soo gabagabeysay olole caafimaadka xoolaha ah oo ay ka fulinaysay waqooyiga wadanka Soomaaliya. Ololahaas oo lagu baartay in ka badan 700 oo kun oo neef oo geel iyo adhi isugu jira.
ICRC oo kaashanaysa ururka bisha cas ee Soomaaliyeed ayaa waxay qeybiyeen daawo xoolaha loo isticmaalo ayna sii marsiisay maamulada si loo daaweeyo xoolaha
ICRC ayaa sheegtay in ololahaas oo laga fuliyay gobolada Togdheer, Nugaal, Sool iyo Sanaag ay ka faaiidaysteen 43 kun oo qof oo kamid ah bulshada ku tiirsan dhaqaale ahaan xoolaha ah.
Dad badan oo xoolo dhaqato ah ayaa khatar gashaa noloshoodu taasoo ay ugu wacan tahay iyagoon u helin xoolahooda xanaano hagaagsan, sidoo kale ICRC waxa ay sheegtay in ay saameeyaan colaadaha iyo masiibooyinka kale kadibna dantu ku khasabto inay noqdaan kuwo hayaan ku jira.
Xooluhu waa laf dhabarta nolosha bulshada goboladaas degan, kuwaasoo si weyn ugu tiirsan nacfiga iyo dakhliga ka soo gala ayuu yiri Patrick Vial oo ah madaxa ICRC ee Soomaaliya.
Maxamed Sheekh Cali oo ah agaasimaha dhinaca dhaqaalaha ee barnaamijka ICRC Soomaaliya ayaa sheegay in tani ay sidoo kale wax ka tari doonto si loo hagaajinayo qiimaha iyo suuq geynta xoolaha taasoo kor u qaadaysa dhaqaalahooda.
Hay’adda ICRC ayaa ka shaqaynaysay Soomaaliya tan sanadkii 1977dii iyadoo si dhow ula hawl galaysay bisha cas ee Soomaaliyeed. Waxayna ka shaqaynaysay dhinacyada arimaha deg degga ah iyo in bulshadu noqoto mid isku filan iyadoo la raacayo sharciga caalamiga ah.
MH/MG
