In la helo Garsoor ku salaysan caddaalad iyo madax banaani buuxda oo aan samayn caddaalad daro iyo musuqmaasuq waa mid qof kasta oo muwaadin Soomaaliyeed ah uu xaq u leeyahay, una qabo baahi kaddib markii dalka uu ku jiray qalalaase burbur iyo colaado sokeeye muddo ku dh0w 22 sano.
Sida ay u burbureen laamihii kale ee kaabayaasha dhaqaalaha, ilihii dowladda iyo hoggaankii siyaasadeed ee dalka ayaa waxaa misana jiray burbur ku yimid waaxihii garsoor ee dalka. Hadda oo Soomaaliya ay u sii tallaabsanayso nabad iyo horumar, ayna dalka ka jiraan maamullo federaal ah ayaa waxaa laga soo kabanayaa burburkii iyo dagaalladii sokeeye.
Inkastoo ay dad badan qabaan in waaxaha garsoorka ay yihiin kuwa curdan ah oo bulshada qaarkeed ku eedeeyaan inuusan ka madax bannaanayn maamullada iyo musuqmaasuq baahsan, haddana waxaa jiray isbadello muuqda.
Abukaate Cabdi Jaamac kilinbe wuxuu hore xilal kala duwan ka soo qabtay garsoorkii Soomaliya iyo kan Puntland, haddana waa qareen madax bannaan, isagoo u warramaya idaacadda Ergo ayaa wuxuu sheegay in waxa ka dhalan kara dhibaato saamaysa guud ahaan shacabka oo dhan, dowladdu waxay ku leedahay inay kor ka ilaaliso hab waafaqsan sharciga oo kaliya ee malaha inay ku samayso faragelin, taasi waxay noqonaysaa mid aan ku habboonayn cadaalad samaynta laga doonayo garsoorka.
Prof. Xuseen Abuukar Xuseen oo isna bare ka ah jaamacadda PSU ee Gaalkacyo ayaa tilmaamay inkastoo ay jiraan hay`ado garsoor, balse ay wali isku milanyihiin hay`adahaas garsoorka iyo maamullada goobaha ay ka howlgalaan.
Barafasoorka ayaa si kooban u sheegay in maanta garsoorka Soomaliya uusan ka madax bannaanayn maamullada jira. “Soomaaliya waxaa horay dumiyay waxay ahayd cadaalad darro iyo musuqmaasuq, waalina waa jirtaa waxayna u baahan tahay in cadaaladda la baadi goobo” .
Dhawr dhacdo oo goobo kala duwan oo Soomaaliya ah ay muujiyeen habacsanaanta ka jirta garsoorka Soomaaliya, loona baahan yahay in Soomaaliya ay yeelato garsoor madax bannaan oo caadil ah, kaasoo horseedi kara nabad iyo horumar.
Xeeldheerayaashan dhinaca sharciga ah ayaa ku dooday in tusaale ka mid ah habacsanaan garsoorka lagu arkay Gaalkacyo, kaddib markii maxakamadda Gaalkacyo ay xukun ku salaysan shareecada islaamka ridday, waxaana markiiba soo fara geliyay go’aankii maxakamadda madaxda ugu sarraysa Puntland. Tanoo keentay in maalintiiba la ruqseeyo guddoomiyihii maxakamadda Gaalkacyo.
Burhaan Maxamed Cabdi/MG/FM
