Dadka ku nool magaalada Laascaanood ayaa waxa ay ka cabanayaan biyo yaraan baahsan oo ka taagan gudaha magaalada ka dib markii durdurka ceelasha ay magaaladu biyaha ka heli jirtay ay biyo yareeyeen.
Arrintan ayaa keentay in ay kacaan qiimaha biyaha macaan la kala siisto, halka qaar ka mid ah dadka aan awoodina ay isticmaalaan biyaha wayeerka ah. Qiimaha biyaha macaan ayaa waxaa magaalada Laascaanood lagu kala iibsanayaa halkii booyad 100,000 shs.
Magaalada Laascaanood ayaa waxaa biyaha looga keenaa deegaanka Kala-baydh oo qiyaastii 40 KM ka baxsan magaalada. Ceelasha Kala-baydh ayaa waxa ay badanaa ku tiirsan yihiin inay galaan biyaha roobabka ka dibna ay soo maaxdaan.
Mar wariyeheenna Cabdikariim Olol uu booqday halka ay ku yaallaan ceelshan ayaa waxa uu noogu soo warramay in goobahan lagu arkayo booyado safaf dhaadheer ugu jira sidii ay biyo u heli lahaayeen.
Dadka deggan Laascaanood iyo nawaaxigeeda waxa ay in muddo ah ka cabayeen ilihii biyaha oo duugmay, tanoo keentay in goobaha biyaha laga helo ay sii yaraadaan.Waxaa xaaladda uga sii daraya iyadoo waqtigan lagu guda jiro jilaal dhexdiisa, lagana yaabo in ay sii adkaato biyo yaraantani.
Cabdikariim Olol/MG
