Ahmednuur: Fuustadii biyo ah waa 45,000 shilin
Xaaalad biyo yaraan ah ayaa ka taagan deegaanka lagu magacaado Gaddoon oo ku yaalla gobolka Galgaduud, ee bartamaha Soomaaliya.
Degaankaan oo qiyaastii ilaa 60km dhinaca bari kaga beegan magaalada xarunta ah ee Dhuusa mareeb ayaa lagu soo warramayaa in ceelka keliya ee dadka iyo duunyaduba ka cabi jireen uu jabay.
Guddoomiyaha deegaankaasi , Axmednuur Xasan Barre, oo u warramayay raadiyo Ergo ayaa sheegay in xaalad adag oo biya yaraan ah ay ka taagan tahay halkaasi, isagoo sheegay in fuustadii biyaha ay deegaanka ka gaartay ilaa 45,000 oo shilinka Soomaaliga ah.
“Muddo isbuuc ah ayuu ceelku fadhiyaa, dadkuna waa biyo la`aan, booyado ayaa biyaha looga soo dhaamiyaa Dhuusa mareeb iyo Mareerguur” .
Guddoomiyaha ayaa intaasi ku daray in deegaanka ay ka jiraan dhibaatooyin dhinacyo badan isgu jira sida waxbarashada, caafimaadka iyo biyaha intaba. Wuxuuna codsi u diray hay`adaha samafalka kaasoo ku wajahan horuumarinta deegaanka.
CC/MG/FM/AM
