Xaalada amniga ee soo hagaagaysa ee magaalada Muqdisho ayaa sare u qaaday rajada iyo damashaadka dadweynaha magaaladaas ee munaasabadda ciidul adxa.
Maanta si ka badelan jawigii hore ee lagu yaqaanay magaalada dad badan ayaa xaadir ku ah xeebaha loo dalxiis tago ee liido iyo Jaziira, kuwaasi oo ka soo kabanaya burburkii ku soo gaaray colaadihii dalka ka taagnaa mudada ka badan 21 sano.
Cabdiqani Cabdulahi ayaa kamid ah dhalinyaro salaadii ciida kadib ku sii socotay xeebta Jaziira si ay ugu soo damaashaadaan, wuxuuna u waramay idaacada Ergo
“Waxaan hada ku wajahanahay xeebta Jaziira, maalinta labaad ee ciidana aniga iyo asxaabteyda waxaan aadi doonaa xeebta Liido, waan ku faraxsanahay in maanta muqdisho oo xaaladeeda amni ay badashay aan ku ciido” ayuu yiri Cabdiqani
Cabdulaahi Xasan oo ah Cabdqani saxbkiis waxa uu xeebta u aadayaa in uu kubad ku soo ciyaaro, sida uu sheegay manta waxa uu heli karaa fursad ay isku arkaan asxaabtiisa.
Faadumo Cali, iyadu waxa ay qabtaan rajo lamid ah tan dhalinyaradaas waxa ay Ergo u sheegtay in ay aad ula dhacsantahay xaalada magaalada Muqdisho.
Wadooyinka, isgoysyada, suuqyada iyo goobo kale oo ka tirsan gobolkan banaadir ayaa waxaa camiray caruur kuwaasi oo si farxad leh koox koox ugu socdo una damaashaadaya munaasabda ciidul adxaa oo maalintii kowaad laguda galay.
Dadka munaasabadan ciida manta magaalada Muqdisho ugu damaashaadaya aayaa waxaa kamid ah boqolaal barakacayaal ah oo xiligan oo kale sanadkii hore ay abaaro iyo macaluul ka soo saareen guryahooda, kuwaa oo qaar kamid ah maanta ii sheegay in ay ku niyad wanaagsan yihiin inay ku dheefsadaan xoolaha udxiyada ah ee maanta oo kale la qalo.
Nasro Cabdi Cismaan/MG
