12 September, 2012 NAIROBMadaxweynayaasha dowladaha Kenya iyo Tanzania Mwai Kibaki iyo Jakaya Kikwete ayaa soo dhoweeyay madaxweynaha cusub ee Soomaaliya, Xasan Sh Maxamuud oo 10-kii bishan si aqlibiyad ah loogu doorto doorasho madaxtinnimo oo mudanayaasha baarlamaanka Soomaaliya ay ugu codeeyeen madaxweynaha cusub.
Laba hoggaamiye ayaa ugu baaqay madaxda Soomaalida inay horey u sii ambaqaadaan dadaalladii horey loo soo billaabay ee geeddi socodka nabadda (Road Map), ayna hirgeliyaan qorshayaal muddo dheer qaata oo la xiriira nabadgelyada.
Labada madaxweyne ayaa ku ammaanay ururka midowga Afrika iyo bulshada caalamka taageerada joogtada ah ee ku aaddan dagaalka lagula jiro Al-shabaab.
Kulan ay labada madaxweyne ku yeesheen aqalka madaxtooyada ee magaalada Nairobi halkaas oo booqasho rasmi ah uu ku joogay madaxweyne Tanzania, ayaa Madaxweyne Kibaki wuxuu ka sheegay in labada dawladood ee Kenya iyo Tanzania ay si wadajir uga shaqaynayaan sidii loola dagaallami lahaa halista kooxaha argagixisada, burcad-badeedda iyo dambiyada caalamiga ah.
War murtiyeed laga soo saaray kulankaas ayaa sidoo kale lagu sheegay in labada dhinac ay xoogga saari doonaan ammaanka gobolka, si loo suurtageliyo koror ku yimaada dhaqaalaha.
MG/FM
