07 September, 2012 NAIROBI Iyadoo baarlamaanka Soomaaliya ay isku diyaarinayaan inay doortaan madaxweyne cusub isbuuca soo socda, ayaa ergay sare oo QM ka tirsan wuxuu farriin u diray xildhibaannada Soomaaliyeed.
Ergayga gaarka ah ee QM u qaabilsan arrimaha Soomaaliya Augustine Mahiga, ayaa warqad furan u qoray xildhibaannada cusub ee baarlamanka taasoo uu kula dardaarmayo inay doortaan madaxweyne leh karti iyo aqoon, Soomaaliyana ka saara dhibaatada.
Mr. Mahiga, oo sidoo kale ah madaxa siyaasadda ee QM u qaabilsan Soomaaliya (UNPOS), ayaa ugu baaqay baarlamaanka inay doortaan musharraxa dalka u noqon doona daacad afarta sano ee soo socota, isla markaana ka shaqeyn doona dhismaha nabadda.
“Waa in rajada ay qabaan shacabka gudaha, waddamada gobolka iyo beesha caalamka laga soo baxaa oo la doortaa madaxweyne keeni doona dowlad wanaagsan, sida hoggaanka mideysan ee barlamaanka cusub ee Soomaaliya, waxeyna arrintaas u taallaa walaalaha rag iyo dumar ee sharci dajinta.” Ayuu yiri Ambassador Mahiga.
Wuxuu ugu baaqay xildhibaannada inay ka fekeraan wanaagga dalkooda iyo dadkooda, isagoo u sheegay in codka ay dhiibanayaan uu yahay mid sir ah oo aan qof kale la ogeyn
“Dooro musharraxa noqon doona daacad kana soo bixi doona hoggaaminta dalka, ee leh aragti fog oo ku habboon afarta sano ee soo socota is badalka iyo nabadda Soomaaliya, ogaada sharaftiinna iyo fursaddiina waxay ku jirtaa cod dhiibashada qarsoodiga ah hana oggolaanina in fursaddani ay siibato.”
10-ka bishan September ayaa lagu wadaa in Soomaaliya ay yeelato madaxweyne cusub, taasoo looga baxayo ku meel-gaarnimada.
CC/FM
