10 September, 2012 MUQDISHO Magaalada Muqdisho waxaa si weyn uga soconaya qabanqaabada fadhiga baarlamaanka oo maanta la filayo in lagu doorto madaxweynaha Soomaaliya hoggaamin doonaa 4ta sanadood ee socota.
Illaa 24 musharax ayaa kamid ah dad u taagan inay qabtaan xilka madaxtinimo ee dalka, waxaana kamid ah Madaxweyne Shariif Sheekh Axmed, Raisul wasaarihii xukuumada haatan uu waqtigeeda dhamaanayo Pro Cabdiweli Maxamed Cali, Dr C/raxmaan Baadiyoow, Raísul wasaarihii hore Maxamed Cabdullahi Farmaajo, Pro Axmed Ismaaciil Samatar iyo Cabdullaahi Axmed Cadoow iyo 18 musharax oo kale.
Waddooyinka magaalada Muqdisho ayaa waxaa saaka lagu arkayaa ciidamada Dawlada iyo midawga Afrika ee AMISOM, waxaana si weyn loo adkeeyay amaanka caasimada.
Doorashan ayaa waxa ay qeyb ka tahay dadaalo isku dhaf ahaa oo ay madaxda Soomaalida iyo beesha caalamka ay garwadeen ka yihiin, kuwaa oo la doonayo in Soomaaliya looga saaro xiliga kumeelgaarka ah iyo fadhiidnimada dhinaca siyaasa ee wadanka daashatay muddo ka badan 21 sano.
Xubnaha baarlamaanka oo tiradooda ay gaarayso 275 mudane ayaa waxaa ay codkooda u ridi doonaan 24 musharax oo ay qudbadahooda dhamaysteen maalmihii la soo dhaafay. Doorashadan ayaa waxaa si weyn caalamka daafihiisa ugala socda malaayiin Soomaali ah oo ay kamid yihiin kumaan kun oo qaxooti ah oo ku nool xeryaha qaxootiga ee waqooyiga bari ee Kenya ee Dhadhaab.
Yusuf Keynaan/MG
