11 September, 2012 LAASCAANOOD Aaladdan calaamadda ah oo uu wiilkan dhalinyarada ah soo saaray ayaa waxa loo isticmaalaa garoomada ciyaaraha, iyadoo ay ku qaadatay inuu farsameeyo mudo labo sano ah.
Cabdulqaadir Maxamed Jaamac, oo ah wiilkan qalabkan soo saaray ayaa sheegay in howshan uu ku bixiyay maskax badan iyo dhaqaale, tanoo ay ku dhiirrigelisay sida uu sheegay inuu qalabakan sameeyo, maaddaama ay sidoo kale jiraan baahida ka jirta garoomada magaalada Laascaanood iyo deegaannda hoosyimaada
Wiilkan ayaa sheegay inay la yaab ku noqotay markii uu soo saaray qalabkan, oo uusan fileynin in aalad heerkaas gaarsiisan uu soo saari karo.
Cabdulqaadir oo sharraxaad ka bixinaya taariikhdiisa shaqo ayaa wuxuu Ergo u sheegay “Aniga waxaan aqaan farsamada dabka waana fursada ii saamaxaday inaan
dadka uga faa`iideeyo aqoontayda dabka aan u leeyahay gaar ahaan dhalinyarada deegaanka, inay iga helaan qalab casri ah oo ay u isticmaali karaan garoomada,”
Mar aan wax ka waydiinnay shaqada qalabkan iyo sida loo isticmaalayo ayaa wuxuu sheegay in qalabkan calaamadda ah uu awood u leeyahay in isagoo lambarkiisa la muujinayo ciyaaryahan kasta looga yeero garoonka dhexdiisa xilliyada isbeddelka ciyaartoyda, isagoo qoraya tirada oo isbarbar taalla sida 6-7.
Inkastoo Cabdulqaadir isagoo aanan haysan mashiin ama aalad farsamo oo casri ah uu soo saaray qalabkan ayaa haddana wuxuu ku rajo weynyahay in aaladdan calaamadda ah ay wax weyn ku soo kordhin doonto deegaanka uu ku nool yahay.
“Wax badan ayuu soo kordhin karaa qalabkan waayo markii hore waxaa dadka marka la kala beddelayo loogu yeeri jiray foorida, taasoo qaadan jirtay muddo dheer haddana hakad gelin jirtay hannaan socodka ciyaarta.” Ayuu yiri wiilkan.
Muddada Cabduqaadir uu farsamaynayay qalabkan ayaa wuxuu kala kulmay caqabado door ah, isagoo sheegay in xitaa xilliga qaar ay ku adkaan jirtay inuu sii wado farsamadiisa, balse wuxuu tilmaamay in go’aankiisa la xiriiray inuu gaaro himiladiisa uu ku hanminayay ay taasi ka adkaatay.
Cabdulqaadir Maxamed Jaamac oo ay ku soo xoomeen dhalin badan ayaa ugu dambeyntii tilmaamay inuu doonayo inuu u mahadceliyo dhammaan taageerayaasha ciyaaraha ee gobolka Sool.
Sida uu aaminsanyahay Cabdulqaadir, waa nin dhalinyarada deegaankaasi wax ku soo kordhiyay, isagoo tilmaamay in qalabkiisa uu gaarsiin doono dhammaan bahda jecel ciyaaraha si ay uga faa`iidaystaan.
Cabdikariim Olol/MG/FM
