Magaalada Muqdisho waxaa lagu waday in maanta oo ay taariikhdu tahay 23-ka bisha Luulyo uu ka furmo shirweynaha ansixinta dartuurka cusub oo ay yeelan doonto Soomaaliya, balse sida uu warbaahinta u sheegay wasiirka dib u heshiisiinta iyo arrimaha dastuurka xukumadda KMG Mudane Cabdiraxmaan Xoosh Jabriil shirweynahaas ayaa waxaa ku yimid hakad.
Mudane Cabdiraxmaan Xoosh Jibriil ayaa sheegay in shirweynaha ansixinta dastuurka cusub ee Soomaliya dib loo dhigay illaa inta laga gaarayo 25-ka bishaan Luulyo, markaas oo uu sheegay in uu ka furmi doono magaalada Muqdisho.
Wasiirka ayaa ku macneeyay dib u dhaca ku yimid shirka inay la xiriirto cillad farsamo oo la xiriirta isdiwaangelinta liiskii ergada ansixin lahayd dastuurka cusub.
Magaalada Muqdisho ayaa si weyn looga hadal hayay shirkaas maanta baaqday, iyadoo ay jiraan warar kala duwan oo ka soo baxaya baaqashada shirkaas.
Wasiirka ayaa ugu dambeyn tilmaamay inuu rajo wanaagsan ka qabo in shirkaas uu furmi doono 25-ka bishan, isla mar ahaantaasna uu wax weyn ka baddeli doono Soomaaliya.
Dib u dhacyadan joogtada ah ayaa waxaa dadka u kuurgala arrimaha siyaasadda ay ku macnaynayaan inay la xiriirto iyadoo aan wali la soo dhammaystirin ergadii ansixinta dastuurka oo wali uu muran ka taagan yahay beelaha qaarkood.
Yuusuf Keynaan/MG
