Muhaajiriin Soomaali ah oo ka badan 600 ayaa waqtigaan ku xiran xabsiyo kala geddisan oo ku yaalla dalka Liibiya, dadkaan oo u badan dhalinyaro ayaa laga soo kala qabtay meelo kala duwan, halka qaar badan oo kalena laga soo qabtay xilli ay ku jireen tahriib ay u saarnaayeen doonyo ay kaga tallaabi rabeen badda u dhaxaysa Talyaaniga iyo Liibiya.
Cabdiqani Maxamed Wacays oo ah safriika Soomaaliya ee Tripoli ayaa Raadiyo Ergo u sheegay “Dadkaan siyaabo kala geddisan ayaa loo qabtay, qaar badan sharci darro ayaa lagu qabtay, waxayna u xiran yihiin waaxda socdaalka ee waddanka Liibiya oo ku eedaynaya inay sharci darro ku soo galeen waddanka”
Najmo Maxamed Jaamac oo ka mid ah maxaabiista ku xiran magaalada Misraata ayaa iyana Raadiyo Ergo u sheegtay in 250 qof ay ku xiran yihiin xabsi ku yaalla Misraata, 30 ka mid ahi waa haween halka inta kalena yihiin rag, waxayna sheegtay in iyada laga soo qabtay xilli ay saarnayd doon ay doonaysay inay ugu tahriibto dhinaca Yurub, Najmo ayaa sheegaysa in ay u xiran yihiin ciidamo sidii jabhad oo kale ah u hawl gala aysanna meel uga bixi karin, maxaabiis isku dayday inay baxsadaanna la dilay, Najma ayaa intaas ku dartay inay quud darraynayaan in laga caawiyo sidii xabsiyadaas looga sii dayn lahaa.
Safiirka Soomaaliya ee Liibiya Cabdiqani ayaa isagu hadallada ka soo yeeraya maxaabiista ku sheegaya inaysan ahayn sida ay wax u sheegayaan, oo dowladda Liibiya ay dadaal ugu jirto inay gebi ahaanba xakamayso hawlaha tahriibka oo dhibaato badan dadka ka soo gaarto, ayna u oggoshahay dadka Soomaalida ah inay joogaan kana shaqaystaan Liibiya, ciddii doonaysa inay dalkoodii dib ugu noqotana ay diyaar u tahay, laakiin Soomaalidu aysan arrimahaas rabin, ayna doonayaan inay tahriibaan, is maandhaafka taaganna yahay arrintaas.
Safaaradda Soomaalida ee Liibiya ayaa ugu baaqday bulshada Soomaaliyeed inay fahmaan dhibaatada tahriibka, ayna isku dayaan in waalidiintu xakameeyaan tahriibka dhibka badan ee ubadkooda ay u soo dirayaan.
Mohamed Hassan/FM
