Tababarkani ay ka qeyb galayaan 25 suxufi oo ka kala yimid gobollada dalka Soomaaliya ee lagu qabtay magaalada Garowe ee xarunta maamul-goboleedka Soomaaliyeed ee Puntland ayaa ah mid lagu barayo suxufiyiinta tabinta wararka ku saabsan bini`aadannimada, xog-doonka iyo sida dabagal loogu sameeyo wararka.
Waxaana maalgalinaya tababarkan hay`adda taageerta warbaahinta ee IMS, iyadoo uu fulinayo Raadiyaha arrimaha bini`aadannimada Ergo kaasoo hoostaga hay`adaasi.
Cabdulqaadir Maxamed Mursal, waa Tifaaftiraha Raadiyo Ergo wuxuuna ka hadlay xafladdii furitaanka tababarkan, taasoo ay ka soo qeyb galeen mas`uuliyiin kala duwan oo ka socotey Puntland iyo dadka u dhaqdhaqaaqa bulshada rayidka, wuxuuna sheegay in tababarkan aanu aheyn kii ugu horreeyay ee ay u qabtaan weriyeyaasha Soomaalida ah.
“Tababarkani aqoon is-weydaarsiga ah oo ay soo qabanqaabisey hay`adda International Media Support (IMS) oo uu hoostago Raadiyo Ergo oo aan filayo in uu yahay tabarkii 4-raad ee lagu qabto deegaannada Puntland, inkastoo tababarro kale lagu qabtay gobollada kale ee Soomaaliya qaar ka mid ah, waxaan kuu sheegayaa tababarkani wuxuu la xiriiraa arrimaha bini`aadannimada, iyadoo markasta uu Raadiyo Ergo baahiyo waxa la xiriira bini`aadannimada, tababarkana wuxuu la xiriiraa xog-doonka saxaafadda.”
Wasiirka wasaaradda warfaafinta Puntland Axmed Cali Askar, oo ka mid ahaa mas`uuliyiinta ka soo qeyb gashay furitaankii tababarkani ayaa sheegay in looga baahan yahay saxafiyiinta inay ka feejignaadaan wararka ay tabinayaan.
“Ma ahan wax sahlan xilka weriyenimada, mas`uuliyad baa idiin saaran, waa in aad ku dadaashaan sidaad u gudbin laheydeen warar sugan, xogta in aad gaarsiisaan dadka idin dhageysanaya waddo dheer ayaa loo soo maraa, ha moodina warka deg degga ah inuu xiiso leeyahay, warka sugan iyo xogta baaristeeda waa waxa warka kobciya.”
Sidoo kale Wasiirka wuxuu cambaareyn kulul dusha uga tuurey kooxaha caadeystay dilka Suxufiyiinta Soomaaliyeed, isagoo ka tacsiyeeyey suxufiyiintii lagu laayey guda dalka Soomaaliya, wuxuuna caafimaad uu ilaah uga baryay Weriye Cabdulqaadir Cumar Cabdulle oo dhowaan dhaawac culus ay Muqdisho ugu geysteen kooxo hubeysan.
Sheekh Cabdirisaaq Xuseen Ciise oo ka mid ah culumaa`udiinka Puntland oo ka hadlay xafladda furitaanka tababarkan ayaa tilmaamey in isgarsiintu ay soo martay heerar kala duwan, loona baahan yahay weriyeyaasha inay iska ilaaliyaan tabinta warar khaldan.
Ma ahan markii ugu horreysay oo hay`adda IMS iyo Raadiyo Ergo ay tababar kan oo kale ah ugu qabtaan suxufiyiinta Soomaaliyeed gudaha dalka, iyadoo tababarkan uu qeyb ka yahay tababarrada sare u qaadaya aqoonta suxufiyiinta Soomaaliyeed.
Axmed Nuur Soomaali/FM
