Sayladaha xoolaha waddanka ayaa kala duwan, iyadoo sarrifka lacagta Doollarka oo hoos u dhacday ay saamayn hadda ku yeesheen qiimihii xoolaha.
Burco
Haddaan ku horrayno sayladda Burco xaaladdeeda iibka xoolaha saaka oo jimce ah aad bay u wanaagsantahay, waxaana jira shirkado dhowr ah oo kuwa xoolaha dhoofiya ah xoolaha iibsanaya, siduu noo sheegay Aadan jaamac dhunkaal oo ka mid ah ganacsatada xoolaha ee Burco, waxayna xooluhu ka kala imanayaan dhammaan qaybaha kale ee waddanka.
Haddaan u daadegno qiimaha ay xooluhu joogaanna Adhiga dhoofka ah
Muunada 1aad = $74
Muunada 2aad = $70
Geela qalliinka ahi wuxuu u dhexeeyaa $550 – 600
Geela dhoofka ah ee 4 jirka iyo shan jirka ah $350
Laascaanood
Sayladda xoolaha ee Laascaanood waxaa saamayn ballaadhan ku yeeshay hoos u dhaca shilinka Soomaaliga, waxaa laga dareemayaa sayladda inaan xarakaad badani oo kala iibsiga xoolaha ah aanu jirin inkastoo la keeno xoolo kala duwan ahmin iyo qalliinba ah, dadka reer miyiga ah ayaa waxay dareemeen hoos udhaca ku yimid xoolaha ay keeni jireen sayaladda magaalada Laascaanood, geesta kale dadaka xoolaha ka ganacsada ayaa waxay noo xaqiijiyeen inaanu jirin iib sidaas u wayn oo gancsiga xoolaha ah.
Adhiga dhoofka
Muunada 1aad = $65
Qalliinka ah = $60
Orgida Jiqiiqda = $40
Geela dhoofka = $620
Geela Qalliinka = $800
Beledweyne
Seyladda xoolaha ee magaalada Beledweyne ee xarunta gobolka Hiiraan oo dadku ku kala iibsadaan xoolaha qaarkood lacagta doollarka mareykanka, sida Dibida noocyadooda kala duwan ee xagga da’da ah iyo orgida jarka ah mararka qaarkood, ayaa waxaa toddobaadkan hakad galay dalabka xoolaha iyo kala iibsigooda taasoo dadka xoolaha ka baayacmushtara ay u aaneeynayaan labo amuurood:
waa koowe hoos udhac ku yimid sarrifka lacagta doollarka maraykanka marka lagu baddalanayo shilinka Soomaaliga, oo gacanta hore ee qabashada $ 100 ( Dollar ) ay ka noqotay magaalada Beledweyne 2450.000 Sh.so halka gacanta dambe ee bixintu ay ahayd 2490.000 Sh.so ah, amuurta labaad ee hakadka loo sababayo ayaa ah saameeynta ammaanka magaalada oo dadka dhaqdhaqaaqooda waddada halboowlaha ah ee marta magaalada bartamaheeda oo aad loo xaddido xilliyada u dhaxeeya 6:30 aroornimo illaa 11:00 barqanimo, taasoo iyana keentay in seyladdii xoolaha ay qaybsanto oo suuq kale ka furmo xaafad kale oo ka mid ah xaafadaha magaalada ee webigu kala qeybqeybiyo, labadaa dhinacna ay u kala jabeen dadka xoolaha soo safarsada iyo kuwii xoolaha iibsada ee isugu imaan jiray seyladda weeyn ee magaalada, taasina ay sababtay habac iyo ku dhiirrasho la’aan ku yimid beecii xoolaha, waxaana sicirka lagu kala iibsanayey xoolaha toddobaadkan uu ahaa sidan : –
Geela Dubaaxa ah = $612
Qurbacda Dhoofka ah = $408
Geela Kawaanka = $448
Awrta Waaweeyn Dalabkoodu ma socdo Qurbacda Rarooyga ( koronka) ah ee baarka cad ee 8 jirka ilaa 9 sanno jirka dalabkoodu ma socdo
Lo’da Dubaaxa = $142
Lo’da Dibida dhoofka ah ee saddex jir ilaa 2 sanno jirka u dhigma 3 jirka = $200 ilaa $ 220
Lo’da dhaqaalka ah dalab ma leh qaallintii qurxan waa= $142 Ariga Dubaaxa = $61
Orgida yar yar ee labo jirka ah ee loo yaqaan ESKa = $44 Wananka dhoofka = $49 illaa $53
Ariga ceesaamaha dhaqaalka ah = $40
Orgida Jarka ee qoboshka ah qooraqabkana ah = $61 illaa $65.
Garowe
Sayladda Garoowe ayaa isbeddel ku yimid dhinaca xoolaha, weriyaheenna Maxamed Cabdullaahi Kooshin ayaana sheegaya in dillaallayda sayladda xooluhu ay dhibaato badan ku qabaan, Aadan Maxamed Cali oo ka mid ah dillaallayda ee Garoowe “Meeshu waa suuq, buuq badan, ma laha biyo, musuqul ma lahan, hadhna ma lahan, marka saddex gaari oo adhiya lagu rogo meel la kala istaago ma lahan, saxadeedu way liidataa.”
Xoolaha ugu badan ee Sayladda Garoowe lagu iibiyo ayaa u badan adhi cadka, xilligaan ayaana lagu jiraa waqti wanaagsan oo ay leeyihiin hilib, dadka reer miyiga ah ee sayladda keensadaan, Maxamed Nuur Cismaan waa xoolo dhaqatada u soo iibgeeyay xoolaha, “Waxaa dhibaato nagu hayo dhulkii xoolo daaqsinka ahaa oo dad seeraysteen, una xirteen sidii dhul beero loo ootay, oo hadda ay adagtahay in la helo dhul ay daaqaan, waxaana ugu sii daran meelihii dooxooyinka ee biyaha lahaa, inna caws buu u oodanayaa, dhibaatada ugu darani waa taas”
Waxayna ascaarta qiimaha xoolaha Garoowe marayaan maanta.
Adhiga
Muunada 1aad = $68
Muunada 2aad = $65
Geela qaliinka ah
Muunada 1aad = $800
Muunada 2aad = $700
Boosaaso:
Adhiga
Muunada 1aad = $70
Muunada 2aad = $65
Geela
Qaliinka = $750
Buuhoodle
Adhiga
Muunada 1aad = $68
Muunada 2aad = $60
Geela
Dhoofka = $ 350
Qaliinka = $500 – 600
Muqdisho
Adhiga
Muunada 1aad = $104
Muunada 2aad = $95
Geela
Muunada 1aad = $1040
Muunada 2aad = $800
Lo’da
Qaliinka 1aad = $286
Baydhaba
Adhiga
Muunada 1aad = $ 84
Lo’da 1aad = $ 256
Geela
muunada 1aad = $820
Qiimihii xoolaha todobaadkaan waa naga intaas, hadaa hayso wax fikrad ah oo ku aadan ascaarta cuntadda iyo xoolaha gobolada wadanka, fadlan noogu soo hagaaji emailka: info@radioergo.org
