08 March, 2012 GEDO
Ka dib markii maalmo ka hor dagaal culus oo sababay khasaarooyin isugu jira dhimasho iyo dhaawac uu ka dhacay degmada Garbahaarrey ee xarunta gobolka Gedo, ayaa weli waxaa ka muuqanaya degmadaasi raadadkii ay reebeen dagaalladii ugu dambeeyey. Waxaa wali xiran oo aan shaqayneynin inta badan dugsiyadii waxbarashada iyo goobahii ganacsiga oo ay ku noolaayeen dad badan oo ka mid ah bulshada ku nool magaalada Garbaharrey, iyadoo isbitaalkii degmadaasina dagaalkii ugu dambeeyey uu khasaaro ka soo gaarey gaar ahaan dhinaca sheybaarka, arrimahaasi oo idil ayaa waxay keeneen in ay sii adkaato nolosha dadkii ku noolaa degmadaasi
Cali Maxamed Ciise, oo ah maamulaha dugsiga sare ee degmada Garbahaarrey oo wareysi siiyay Raadiyo Ergo ayaa wuxuu sheegay in dagaallada iyo Colaadaha ka taagan deegaanka inay dhabar jab ay ku keentay ardaydii faraha badnaa ee wax ka baran jirey degmadaasi oo sanadkan lagu waday qaarkood inay ka qalin jebiyaan dugsiga sare oo ka barakacay deegaanka, isagoo tilmaamay dagaalkii ugu dambeeyay ee ka dhacay degmada Garbahaarrey inuu curyaamiyay adeegyadii aasaasiga u ahaa nolosha bulshada, sida waxbarashada, ganacsiga iyo caafimaadka.
“Dhibaatooyinka ka dhashay dagaallada ayaa waxaa ugu daran waxaa kala go`ay ayuu yiri daruustii ay ardaydu qaadanayeen, inta badan ardayduna waxay waxbarasho u doonteen magaalooyinka Muqdisho, Mandhera iyo weliba xeryaha qaxootiga ee ku yaalla dalka Kenya, isagoo sheegayna arday badan oo sanadkan ka qalin jebin lahayd dugsiga sare inay ka baaqdeen daruustii ay qaadan lahaayeen.
Cali ayaa dhinaca kale wuxuu sheegay dadka deegaanka dhibaatooyinkaasi inay u sii dheer tahay dhaqaalo darro ka jirta deegaanka, ka dib markii uu istaagay dhaqdhaqaaqii ganacsiga ee ka jiray deegaanka, wuxuuna tilmaamay inta badan dadkii ku noolaa degmadaasi Garbahaarrey inay u carareen magaalooyin ay ka mid yihiin Baladxaawo, Mandhera iyo tuulooyinka hoos taga degmadaasi.
Xilligan lagu guda jiro wey adag tahay inay dib u soo laabtaan adeegyadii kala geddisanaa ee bulshada oo dadka deegaanka ay baahida weyn u qabaan, waayo waxaa weli taagan cabsidii iyo xiisadaha colaadeed oo markii horaba sabab u ahaa inay xirmaan adeegyadaasi.
Si kastaba ha ahaatee, ku dhowaad muddo hal sano ka badan waxaa Gedo ku soo noq noqonayay dagaallo u dhexeeya Ciidamada dowladda iyo ururka Al-Shabaab oo ku loollamaya gacan ku haynta gobolka, dagaalladaasoo sababay khasaarooyin isugu jira dhimasho, dhaawac, barakac iyo burbur hantiyeed.
Axmed Cumar Saalixi/MH/FM
