Dabkan oo ka kacay suuqa weyn ee magaalada Boosaaso 3-dii bishaan, ayaa waxaa ka soo baxaya warar kala duwan oo la xiriira khasaaraha nafeed iyo tan hantiyeed ee uu dabku geystay.
Sida uu ku soo warramayo wariyaha Ergo ee Boosaaso, dabka oo baabi`iyay dhammaan goobihii ganacsiga sida qeybta lagu iibiyo cuntada sida Burka, Bariiska, Sonkorta iyo Saliidda, bacadlaha dahablaha iyo sidoo kale qeybta qudaarta iyo hilibka ayaa wuxuu sababay geerida hal qof iyo dhaawaca labo kale.
Inkastoo laamaha dab damiska Dowladda hoose ee degmada Boosaaso iyo ciidamada ammaanka ay iska kaashadeen sidii dabkaasi loo xakameyn lahaa, ayaa taasi aysan wax weyn ka tarin dabka laakiinse ciidamada oo hareereeyay suuqa ayaa goor dambe dadweynaha u oggolaaday inay galaan suuqa si ay uga qeyb qaataan howlaha samatabixinta iyo daminta dabka.
Madaxweynaha Puntland Dr C/raxmaan Maxamed Maxamuud Faroole, oo ka hadlay dabkan ayaa wuxuu sheegay in arrintan ay ahayd masiibo rabbaani ah oo ka timid xag alle, loona baahan yahay in layeesho dulqaadkeeda.
Dadweynaha faraha badan ee suuqaasi ka soo saaran jiray quutul yoomkooda oo u badnaa danyar ka xamaalan jirey suuqa, ayaa waxaa soo food saartay shaqo la’aan.
Suuqa weyn ee magaalada Boosaaso ayaa lagu qiyaasayaa inuu ku fadhiyay dhul cabbirkiisu yahay 500×500, waxaana uu udub dhexaad u ahaa dhaqaalaha magaalada ganacsiga ee Puntland.
Si kastaba maamulka Puntland, ayaa u saaray guddi dhawr xubnood ah oo ka shaqayn doona sidii loo soo uruurin lahaa hantida suuqa ku burburtay iyo waliba u gargaaridda dadkii hantidooda ay ku bas beeshay dabka.
Dhinaca maamulka gobolka Bari iyo mas`uuliyiinta Puntland, ayaa shir ay qaateen oo uu shir guddoominayay wasiirka ammaanka Puntland Khaliif Ciise Mudan, ku sheegay inay socdaan baaritaanno la xiriirta sababta keentay gubashada suuqa
Axmed Nuur Ibrahim/MG/FM
