(ERGO) – Isaaq Cabdullaahi Madoowe macluumaad uu ka faa’iiday dhegaysiga Raadiyow Ergo ayaa ku caawiyay inuu nolosha horumar ka sameeyo isaga oo ku sugan tuuladiisa.
Ninkan ayaa sheegay in barnaamijyada maalinlaha ah ee ay sii dayso idaacadda inuu ka bartay aqoon u sahashay inuu ku dhiirrado dhul tacbashada oo uusan horay niyad ugu hayn.
Isaaq oo ku nool deegaanka Busley ee duleedka Baydhabo, ayaa awood u yeeshay inuu ku filnaado nolosha qoyskiisa iyo waxbarashada carruurtiisa.
“Caruurteyda waxay dhigtaan dugsi, in kasta oo ay tuulada iskuul la’aan ay tahay. Waxaan carruurta ku bixiyaa $10 bishii oo aan beerta ka soo saaro. $10 beerta ayaa meel u dhigaa inta kalena masruufka reerka.”
La socoshadiisa tebinta raadiyaha oo 10 jirsatay ayaa u noqotay hage dhanka nolosha ah, taas oo u horseeday inuu kor u qaado wax soo saarka beertiisa oo saddex hektar ah iyo in uu kala qorsheeyo.
Hal hektar oo ka mid ah ayuu xusay inuu ku abuuro qudaar geed mirood ah sida saytuun, babaay iyo liin. Inta kale wuxuu ku ridaa gallay iyo mesago.
Ku xirnaanta idaacadda ayuu ka ogaaday in la kala duwi karo waxa uu saarayo beertiisa. Hadda wax soo saarkiisa ayaa gaara toddobo tuulo oo deris la ah deegaankiisa.
Isaaq ayaa ku guulaystay inuu carruurtiisa oo lix ah iyo xaaskiisa uu guri jiingad uga dhex dhiso beertiisa. Wuxuu sidoo kale gatay haamaha cayayaanka looga buufiyo dallagyada markii uu ka ogaaday talooyinka khubarada.
Xogahan beddelay noloshiisa wuxuu sheegay inuu si gaar ah ugala dhex baxay barnaamijyada ka hadla deegaanka iyo beeraha oo uu ku taxan yahay.
Isaaq ayaa tilmaamay inuu markii hore dhirta ka jari jiray beertiisa balse hadda uu iska daayay markii uu raadiyaha ka maqlay inay geeduhu muhiim yihiin oo la badbaadiyo.
Qaabaynta sooyaalkiisa nololeed waxaa sabab u noqotay idaacadda Ergo oo uu kala socdo hadda raadiye yar oo ah kii saddexaad oo uu gado.
Ninkan oo rajo beel ka joogay sii wadida wax beerashada oo uu billaabay sanadkii 2010 ayaa ka miro dhaliyay hankiisii markii uu macluumaad ku filan ka helay dhegeysiga idaacadda.
“Markii hore beeraha qalbigayga kuma jirin, laakiin hadda waxaan ka faa’iiday waxyaabo badan sida,dhul diyaarinta, abuurka, iyo cilmiga laga barto khubarada beeraha. Waxaan ku qanacsanahay in raadiyaha uu ahaa mid nolosheyda wax weyn ka beddelay.”
Isaaq faa’iido uu ka helay beerta wuxuu ku gaday toddobo neef oo ari ah balse waxay kaga dhinteen roobabkii dayrtii la soo dhaafay.
Culeysada haysta ee ka imaanaya isbeddelka cimilada, waxaa ka mid ah roob yari marar qaar qasabta inuu waxba goosan balse wuxuu qorshaynayaa inuu samaysto goob uu biyaha ku kaydsado.
“Biyaha waxaan u aadnaa meel 10 km noo jirta, ama mid kale oo 7km naga fog.”
Isaaq wuxuu tusaale nool u yahay shaqsiyaad ay noloshooda iyo midda qoysaskooda ay wax ka bedeshay inay wehel ka dhigteen dhegeysiga idaacadda Ergo oo maalinle u tabisa barnaamijyo, kuwaas oo loogu tala galay inay bulshada wax ku kordhiyaan.
