(ERGO) – Sahro Cabduqaadir Maxamuud oo 38 sano jir ah ayaa awood u yeelatay maaraynta nolosha carruurteeda oo shan ah, markii iibinta dharka oo ay ku billowday meel hoose bishii Janaayo ee sanadkan ay ka sameysay horumay fiirsan.
Waxay xarun cusub ka furtay suuqa wayn ee Bakaaraha. Xaruntan ayaa ka caawisay inay maalinle u hesho lacag u dhaxaysa $20-$30, taas oo qoyskeeda u sahashay inay ka walwal la’aadaan cunnada ay cunaan saddex waqti maalintii.
Haweeneydan ayaa sheegtay inay shan qof fursad shaqo ka heleen goobteeda, kuwaas oo qoysaskooda ka maareeyaa mushaarka ay qaataan oo ah bishii $120. Waxay tilmaamtay in ganacsigeeda uu gaarsiisay isku filnaan ah inaysan cid kale ku tiirsanaan.
Ka hor ganacsigan waxay ku tiirsanayd $2 oo ay ka heli jirtay dhar baati ah oo ay dayn ku soo qaadan jirtay, kaas oo ay ku gadi jirtay gurigeeda, balse Sahra ayaa hadda niyad dhis iyo kalsooni ka heshay shaqadeeda, waxayna rumeysan tahay in wax badan ay ku soo kordhisay nolol ahaan qoyskeeda oo ay iyadu u tahay qofka u dhaqdhaqaaqa.
“Markaad tahay qof shaqo la’aan ah oo bilaa bilaa camal ah marwalbo waxaad dareemeysaa caajis iyo fikir iyo inay dhibaato ku furan tahay, marka aniga shaqadan wax wayn bay igu soo kordhisay.”
Hab nololeedka qoyskeeda ayaa isbeddelay waxay ku guulaysatay inay guri gaar ah degto, maaddama ay hore dul saar ugu aheyd reer ay qaraabo yihiin oo ku caawiyay qol ka mid ah gurigooda, kaas oo aan ku filneyn marka la eego tiradooda. Sidoo kale saddex ka mid ah carruurteeda oo ay horey ugu awoodi wayday waxbarasho dhaqaale la’aan darteed ayay iskuuul ka qortay bishii Febraayo ee sannadkan.
Waxay sheegtay in ay san filayn koban ganacsi ee deg-degga ah, balse waqti badan ayay ku qaadan jirtay horumarinta iyo dadaalka ay ku bixiso ganacsigeeda, taasi oo kaalin ka qadatay in ay macaamiil badan yeelato ganacsigeeda oo horumar sameeyay.
“Horta macaamiil badan waan heystaa Masha Allah. Inta badan macaamiisha igu xiran Muqdisho iyo gobollada kale ee dalka ayay joogaan. Waxay iga soo dalbadaan badeecaddaha Kaargo in loo saaro. Dadka Muqdisho jooga inta badan dadna xarunta ayay igu soo booqdaan dadna online-ka ayay ku soo dalbadaan oo si delivery ah loogu adeegaa.”
Haweenydan ayaa tilmaamtay in marar kala duwan ay ku sigatay inuu ka burburo ganacsigeeda, balse dhabar adeeg iyo samir ay ku soo gaartay halka ay marayso. Wax-soo-saarkeeda waxaa ku xiran xoogsato dib faa’iido uga raadiya dharka ay jumlo ahaanta uga qaataan.
“Xaqiiqda marka laga hadlo lacagta aan ku billaabay mid aad u yar bay ahayd. waxaan ku bilaabay tusaale oo kale lacag $200. Xattaa mid aniga aan leeyahay ma aheyn. Lacag uu leeyahay qof qosykeenna ka mid ah uu i siiyay ama igu saaciday aheyd. Taas baan ku bilaabay ganacsigana sidiisa marka la billaabaayo wuxuu isugu jiraa kheyr iyo qasaaro. Marka dhibaatooyin badan waan la soo kulmay, waa kufay waan istaagay.”
Ka hor shaqadan waxay aheyd guri joog la nool walwal maalmeed la xiriira biil u helidda caruurteeda. Waxay dhexda u xiratay sidii ay u dabooli laheyd labada kaalin ee ay ugu jirto ubadkeeda. Sahro ayaa xustay in hadafkeedii uu u hirgalay.
“Waad dareemi kartaa hooyo nolosha carruurteeda la daalo dhaceyso, laakin marwalbo waxaan ku fikiraayay in carruurteyda baahidooda la dareemin, waxbarasho la’aan oo xagga dhaqaalaha aysan la kulmin, marka hadda shaqadan aan billaabay nolosheyda waxaan ka dareemay dhaqdhaaq, dhiiri gelin. hadda hadafkeygii waan ku guuleystay, waan ku faraxsanahay carruurta aan dhalay inaan maanta u shaqeeyo, kaalintii aabbahood iyo tii hooyonimo labadaba inaan isku qaato.”
Markii hore waxay soo qaadi jirtay hal daaqad illaa shan daaqad oo dharka kariska ah, hayeeshee hadda waxay soo qaaddaa kooliyaal ama in ka badan 100 daaqad oo dharka kariska ah.
Xarunta dharka ay ku kariyaan ayaa toban laabo u jirta hoygeeda oo ku yaalla degmada Deyniile ee gobolka Banaadir kadibna waxay u qaadaa suuqa. Rinji midabo kala duwan ka kooban ayay dharka ku nashqadeeyaan.
Haweeneydan oo ganacsigeedu sideed sanno jirsaday ayaa ku rajo weyn inay ku sii ballaariso gobollada dalka.
