(ERGO) – Aamino Maxamed Maxamuud oo ah 30 jir waxa ay isbeddel nololeed u horseeday qoyskeeda, waalidkeed iyo siddeed dhallinyaro ah oo fursado shaqo ka helay garaash ay leedahay oo ku yaalla magaalada Boosaaso.
Waxa ay soo saartaa agabyada loo isticmaalo guryaha, gawaarida iyo xafiisyada sida albaabada, sariisaha, miisaska iyo kuraasta . Waxay si maalinle ah alaabaha ay farsamayso uga iibisaa macaamiil gaaraysa 15 ilaa 20 oo iskugu jira sharkado iyo shaqsiyaad.
“Mustaqbalka waxaan doonayaa in aan shirkadwayn ay noqdo oo ilaa iyo aan gaarsiiyo in wax dabadda ka yimaadba laga raysto ayuu mustaqbalkaygu yahay,”
Aamino oo ah hooyada saddex carruur ah galinka danbe ee maalinta ayay shaqada aaddaa halka subaxdiina ay qabsato hawlaha guriga iyo daryeelka carruurta oo kan ugu yar jiro siddeed bil.
Shaqo abuurkan ay sameystay waa midka kaliya ee ka jira Boosaaso oo gabar ay ku dhiirtay hirgalintiisa. Waxa ay dhallinyarada kula talisaa in ay samaystaan hal abuur ay leeyihiin halkii ay shaqo u raadsan lahaayeen shirkado ama xafiisyo dawladeed.
Aamino ayaa xarunta ku furtay $700 oo qoyskeedu ku taageereen iyo $2,00 oo ay bangi ka soo amaahatay, balse ay iska gudday lix bil gudahood.
Kororka dhaqaale ee xarunta waxa ay u suuragaliyay in ay qaadato shaqaale mushaari ah. Cabdulaahi Cabdi Shooble wuxuu kamid yahay dadka shaqo abuurka ka helay.
Fursadda shaqo ee uu helay ayaa qoyskiisa oo shan qof ah iyo labadiisa waalid oo wayeel ah ka caawisay inay helaan cunnada saddex waqti maalintii.
Cabdulaahi wuxuu xarunta ka qaataan $400 oo mushahar ah, maadaama uu yahay injineerka guud.
“Inta isoo gasha nolosha qoyskayga waa ku filantahay. Nin ku ladan baan hayn inta isoo gasha, waana ku faraxsanahay 100% . Nolosha bini’aadanka ayaa waxa ay tahayba hormar,”
Aamino oo ah maamulaha xarunta Gaashaan waxa ay naawilaysaa in ay badiso xarumaheeda si ay dhalinyar badan ay shaqo uga helaan wax soo saarkeeduna uu u kordho, maaaama ay ka warhayso dhibaatada ay leedaha shaqo la’aanta dalka ka jirta.
