(ERGO) – Shukri Cabdixakiin Garwayne 18 jir agoon ah ayaa waxbarashadeedii uga hartay inay soo saarto nolol-maalmeedka walaalaheed. Qoyska Shukri oo ka kooban sagaal qof ayaa hadda biisha dhaqaale 300 oo doollar ah oo bishii ka soo gala sawir gacmeed ay u sameyso goobaha waxbarashada, caafimaadka, dadka furanaya ganacsiga iyo xafladaha.
“Lacgta aan helo waxay naga kaafisaa cunto nagu filan in aan helno qoys ahaan, dugsiga qur’aanka waan kaga bixiyaa carruurta, koronta iyo guud ahaan waxyaabaha aasaasiga ah qofka maanta adduunka ugu taajirsan ayaa wax kale u sii baahan marka meel fiican ayay naga buuxisay shaqadan aan hayo,”sidaa waxaa Radio Ergo u sheegtay Shugri Cabdixakiin Gadhwayne.
Shukri oo hadda shaqada wadda bishi saddexaad ayaa ka mid ah 13 dhallinyaro ah oo loo tababbarray xirfadda sawir gacmeedka oo laga qoray xaafadda ay deggan yihiin dadkii ka soo laabtay xeryaha qaxootiga Dhadhaab ee dalka Kenya ee Midnimo. Barashada xirfaddan oo bilaash ahayd ayay billowday bishi Jannaayo ee sanadkan, waxayna dhammaysay bishi afraad ee isla sanadkan.
“Waxaan ku helay fursad gabar ayaa ii soo sheegtay in xaafadda laga qorayo dhallinyaro la barayo xirfadda kadibna waan raadiyay dadkii waday diiwaangalinta sidaa ayaana ku billaabay, maanta si fiican bay ii anfacday oo nolaoshayda iyo tan qoyskayba way ladan tahay,” ayay tiri Shukri.
Da’yartan ayaa waxbarashada uga hartay fasalka labaad ee dugsiga sare bishi Janaayo oo ahayd xilligii ay billowday barashada sawir gacmeedka kadib markii ay isku wadi wayday iskuulka iyo barashada farsamada. Sababta ugu wayn ee ay uga hartay waxbarashada ayaa ahayd in uu hoos u dhac ku yimid tukaan ganacsi oo ay gadi jirtay hooyadeed.
“Markii hore waxaan degganayn xaafad magaalada ku dhextaalla oo si fiican ayuu u kala socday ganacsiga. Dhaqaalaha naga soo gala wuu nagu fillaa balse markIi aan u sooo guurnay xaafadda Midnimo oo shan kilo mitir u jirta magaalada iyo dadka degan oo yar waxaa hoos u dhacay ganacsiga tukaanka ugu dambayn wuu xirmay oo wixi yaallay waan biilanay,” ayay tiri Shurki.
Shukri iyo Qoyskeeda sannadkii 2015 ayay ka soo laabtay xeryaha qaxootiga Dhadhaab. Noloshooda ayaa isbeddeshay isla sanadkaas markii aabbaheed oo ka tirsanaa ciidanka maamulka Jubbalaan lagu dilay dagaal dhexmaray ciidanka iyo Al-shabaab.
Xirfaddan oo ay jecleyd ayay u aragtay inay ku kabi karto nolosha qoyskeeda. Qorshaheedu ma aheyn inay waxbarashada uga harto balse duruufta ayaa ku kaliftay inay qaadato go’aankan si ay reerka uga badbaadiso gaajo iyo wax la’aan la soo derista.
“markaan yaraa sawi-raanta aadban u jeclaa in aan sawiro, hamigayga ayuu ahaa. Marka koobad anigu waxaan jeclaa in aan noqdo qof wariye ah, kan labaadna waxaan Jeclaa in aan sawir gacmeedka barto oo waxyaabo badan soo saarta, sida sawirrada ma’aragtay hadlaya,”sidaa waxaa tiri Shugri Cabdixakiin.
Qalabka ay Shukri isticmaasho waxaa ku caawiya macallinkii baray xirfaddan maadaama aysan haysan qalab u gaar ah oo ay u adeegsato shaqada ay qabanayso. Waxay xustay in hadda ay la dalaa dhacayso nolosha aasaasiga ah oo aysan awoodin inay soo gadato agabka ka maqan.
“Dhibaatooyinka i haysta waxaa ka mid ah dharkii aan xiran lahaa ee truck Suit-ka, dharkii isku tolnaa iyo kabihii, saako iyo xijaab in aan ku shaqeeyo, Saakada iyo xijaabkana uu iga hal haleeyo wixii aan sawiraayey, darbiga dabayshu xijaabka iga saar saarto, iyo in aanan agabkii wax lagu sawiraayey haysanin iyo jaranjarooyinkii iyo wax walba oo dhanka Art’s-ka ah oo agab dad leeyahay ku shaqaysto,”ayay tiri.
Jawaahir Cabdullaahi Maxamed oo ah hooyada dhashay Shukri ayaa sheegtay in gabahdeeda ay hammi sare ay ka leedahay dhanka waxabarashada balse ay ka fursan wayday inay u xamaasho qoyskeeda oo aysan cid kale u shaqeynin.
“Gabaydha waxbarashada way jeceshay wayna dhigan jirtay markii hore laakiin hadda waa loo baahday inay ka qaybqaadato korinta carruurtooda xal kale ma hayo oo aan ka ahayn,” ayay Jawaahir.
Macallin Cumar Khaliif oo ah ninka tababbaray Shukri ayaa sheegay in afar iyo tobankii qof ee la tababbaray ay ka tahay qofka keliya ee maanta ka shaqeeya, ayna ka duwanayd ardaydii ay wax wada baranayeen madaama ay laheyd hami iyo raabitaan maanta u sahlay inay ka samayso dhaqaale.
“Contract way qaadan kartaa oo way ku shaqayn kartaa, way ku maarayn kartaa nolosheeda iyo nolosha qoyska. Waan u yeeraa mararka qaar, marna iyada iskeed ayey u shaqaystaa oo agab ay hadda ku shaqaysato waan u hayaa oo waan ku caawiyaa,”Sidaa waxaa yidhi Macalin Cumar Khaliif.
