(ERGO) – Falis Cabdi Xaashi oo deggan xerada Daryeel ee duleedka magaalada Cadaado waxaa iyada iyo labo carruur ah oo ay dhashay ay ka faa’iidaysanayaan iskuul bilaash ah oo xerada ay sanndkii hore sameeyeen macalimiin isxilqaamay.
Falis oo ah hooyada siddeed carruur ah waxaa qoyskeedu oo barakac ahaa labadii sano ee u dambeysay markii labo boqol oo ari ah iyo rati ay ku waayeen abaartii 2017-dii. Ma aysan awoodin iyada iyo saygeedu inay iskuul geeyaan carruur maaddaama aysan haysan il dhaqaale ka soo galo.
Waxay bishii tobanaad ee sanadkii hore nasiib u yeesheen inay ka mid noqdaan ardayda iskuulkan. Haweenaydan ayaa tilmaamtay in iyadu aysan helin waxbarasho markii ay yarayd laakiin hadda ay carruurteedu wax u baranayaan iyaduna ay la dhiganayso si fursadda ay uga wada faa’iidaystaan.
“Wax weyn baan wallaahi ka helay, aniga iyo carruurtaydu waxaan ka baranay wax badan waxaan dhigannaa Soomaali, xisaab, iyo Carabi jawigeennu waa jawi waxbarasho wiliba waan sii hiigsanayaa in aan sii wado aniga waligay waxbarashada waan jeclaa.“
Waxay xustay Falis in aysan waxna qori jirin waxna akhrin jirin kahor intaysan iskuulka gelin, dhanka kale waxay ka tilmaameysa in aysan jirin wax kharash ah oo uga baxa waxbarashada iyada iyo carruurteeda.
Iskuulka oo hadda ay dhigtaan 140 arday oo 20 ay dad waawayn yihiin waxaa lagu baraa waxbarashada dugsiga hoose. Billowgii waxaa macalimiintu haysteen sabuurad u saarneyd geed hoostiis oo darmo loo dhigi jiray ardayda sida uu sheegay Khaalid Axmed Maxamed oo ah maamulaha dugsiga. wuxuu ka warramay xaaladda ay ku billaabeen iskuulka iyo cidda fikradda lahayd.
“Si aad iyo aada u xasaasiya ayaan ku bilaawnay sabuuradaha iyo wax walba midba meelbaan ka sooqaadnay iskoolaadka sababtoo ah meel aan kursi lahayn oo miis lahayn oo sabuurad lahayn oo dad wax labaraayo waad dareemi kartaa, iskuulkaaan anigaa fikirkiisa lahaa macallimiin kalana waa ila gacan-qabteen.“
Hay’adda Mercy Corps ayaa bishii sagaalaad ee sannadkii hore iskuulka u dhistay saddex qol oo kala ah labo fasal oo ay ardaydu wax ku bartaan iyo qol ay carruurtu ku ciyaaraan. Iskuulka oo ku eg dugsiga hoose ayaa Khaalid sheegay in maamulku uu hadda qorshaynayo sidii ay u gaarsiin lahaayeen dugsi dhexe.
“Waabaryaaba warkiisa leh markii hadda ay noogu gudbayaan dugsiga dhexe taasna sidii aan u qaabili karno iyo haddii dhismo aan helno dheeriya markaas ayaan u gudbi karnaa dugsi dhexe dugsi sarena haddee waa markii alle nagaarsiiyo.”
Fardawso Axmed Caalin waxay ka mid tahay hooyooyinka wax ka barta iskuulkaan muddo 5 bilood ah. Galab walba ayay soo aaddaa marka laga reebo maalmaha Khamiista iyo Jimcaha. Waxaab Fardowsa fursadda waxbarasho oo ay ka heshay iskuulkan.
“Waxaan dhigtaa Soomaali xisaab Carabi tarabiyo saynis iyo English dhamaantoo waan jeclahay tarabiyada ayaan u sii jeclahay Englishka ayaa I dhibi jiray hada waa fahmay waxbarashada waligayba waan jeclaa ee waanan helin waxaan rabaa in aan gaaro tan iyo meesha ugu danbaysa.”
Macalimiinta iskuulka oo ah afar rag ah iyo hal dumar ah waxbaridda ardayda ka sokow waxay ardayda qaar ka bixiyaan lacagta buugaagta iyo waxyaabahada kale ee ay u baahan yihiin.
“Waa dareemikartaa qofkii inta kuu keena carruur ku yiraahda mucalimaw anigu saan u galo maaqaan cunigiina ku agtaagan yahay 7 buugna loo baahan yahay ayaan u gadnaa si ayan carruurtu iskuulka uga harin,“ ayuu yiri Khaalid maamulaha iskuulka.
Iskuulkaan tan iyo markii la’aas-aasay ma jiro qof waxbarasho la’aan ay carruurtiisu guriga u joogaan kaamka Daryeel iyadoona uu furan yahay labada galin ee maalinka oodhan marka laga reebo maalmaha Khamiista iyo Jimcaha.
