(ERGO) – Cayayaanka ayax oo teer iyo dhamaadkii bishii Juun dul-fadhiyay deeganada Buuralayda gobolada Sanaag iyo Bari ayaa haatan bilaabay in uu baabi’iyo beeraha iyo daaqsinka xoolaha, isagoo u ruqaansanaya aagag cusub, sida ay sheegtay wasaaradda deegaanka, Beeraha iyo Isbedelka cimilada ee Puntland.
Ayaxa oo habeenkii guur guuraya ayaa toddobaadkan si balaaran ugu fiday deegaano uu ka helay qoyaan iyo cagaar oo hoostaga degmooyinka Laasqoray, Badhan, Bosaso, Isku-shuban iyo Qandala oo ka mid ah labadaas gobol kuwaa meelo ka mid ah uu helay roob horudhac ah oo aan badnayn. Laakiin khasaaraha uu geystay ayaa weli xadidan sababtoo ah dabaylaha xoogga leh ee xagaaga oo soc socodkiisa maalintii xakamaynaya.
Toddobaadkii hore, wuxuu ayuxu khasaare lixaad leh u geystay 20 beerood oo yaryar oo ku yaalla tuulada Ceel-daahir ee hoostagta degmada Boosaso, sida uu sheegay Bashiir Samatar Muumin, oo madax u ah iskaashatada beeraleydaas kana mid ah dadka beerahooda wax yeellay.
“Ayaxa waa joogaa, shalay iyo dorraadba beerahayaga ayuu cunay, ayaxa aad buu u joogaa beertii uu galena waxba ka reebi mayo, wixii khudaara ayuu cunaayaa siidhka wuu cunaya, yaanyada kabsarada, barbaroonida,” ayuu yidhi Bashiir
Wasaaradda deegaanka iyo Isbedelka cimilada iyo hay’adda maaraynta masiibooyinka Puntland ee HADMA ayaa khamiistii qaylo-dhaan ka muujiyay arrintan. Waxay xaqiijiyeen in ayuxu uu hadda qaarkiis u gudbay deegaanka xoola-daaqeenka ah ee Sarmaayo iyo dooxadda beeralayda ah ee Xallin oo labaduba ka tirsan gobolka Sool.
Labada xafiis waxay sheegeen in aan khasaaraha si dhab ah loo heli karin ilaa ayaxa dhulka laga kiciyo, dabadeedna qiimayn rasmi ah la sameeyo.
Cabdullaahi Axmed Maxamed oo ka mid ah beeralaydaas ayaa Raadiyo Ergo u xaqiijiyay in uusan weli isticmaalin abuur khudaareed (Siidh) isugu jira Basal, Yaanyo, Qare Batiikh, Basbaas, Digir uu ka bixiyay $200 oo qorshuhu ahaa in beerta ku abuuro bishii hore.
“Ilaa hadda ma shubin waan soo iibsaday waa ii yallaan, (hadii uu sii oonalaya) wuu khasaaroobaya dhulkii waa dhul kulul meeshan kuleylka afartan iyo dheeraad ayuu gaadhaa, hadda Basasha bisha lixaad ayey dhacaysaa caadi ahaan lakin marka kulalkeykan lagu daro tobnaad waa dhacaysaa oo dabadeed lama beerankaro,” ayuu yiri Cabdullaahi
Cabdullahi dhaqaale ilaa $3,000 ah ayuu xiliyadan oo kale beerta ka sameeyaa, balse hadda wuxuu waynayaa fursadaas maadama weli ay khatarta ayuxu jirto
“Way adkaanaysaa haddii uu sii joogo (ayuxu), xilligaas baan wax beeraynaa ma orankarno, waxaa noo xigeysa bisha sagaalaad ee danbe, haddii sidan lagu jiro waxaa moodaa in wakhtigii naga dhacayo ilaa Tobnaad, waayo wixi Tobnaad loo gaadho wixii la beero waxay noqonaysaa in shanaad la goosto,” ayuu yidhi Cabdullaahi
Wasiiru-dowlaha deegaanka, Beeraha iyo Isbedelka cimimilada ee Puntland Cabdirshiir Cali Geelle ayaa Ergo u sheegay in ay tageen meelaha uu ayuxu ku habsaday.
“Ayaxu waa aafo ka daran abaarta wuxuu ka tagayaa ugxan hadhowna markay dillaacdo dhib ah, dadka in ay farsamooyin sameeyaan meelaha dooxooyinka qiiq ku shidaan in biro loo tumo ayaan u sheegnay, dabcan wuxuu u baahan yahay diyaarado buufiya kuwaasna waddankeenna ma’yaaliin,” ayuu yiri Geelle.
