(ERGO) – Dadka xoolo-dhaqatada ah iyo beeralayda ee deggen deegaanno hoos yimaada degmada Taleex ee gobolka Sool, ayaa ka walaacsan geedka Garan-waaga (Cali-garoobka), kaas oo saddexdii sano ee la soo dhaafay oo deegaannada ay abaaro ahaayeen ku faafay dooxooyin ay xooluhu daaqi jireen.
Geedkaan oo qabsaday saddexda dooxo ee kala ah Maragmaal, Gabi geedh iyo Xeri-heere ayaa dadkii deggenaa waxay sheegayaan in uu ku faafay oo aysan hadda u daaqi karin xooluhu.
Dooxada Dhumay oo dhul 20km ah ku fadhida inta aan geedkaani ka bixin ka hor waxaa xoolahooda daaqsin u keeni jiray 1,500 oo qoys halka ay haddana wax ka yar 200 oo qoys ay yimaadaan.
Maxamed Cabdi Xasan oo ka mid dadka xoolo-dhaqatada ee deggan dooxada Dhumay ayaa sheegay in uu u naq-raacay koonfurta gobolka Sool muddadii abaarta ay jirtay, hadda markii uu roobku da’ayna ee uu ku soo noqday deegaanka wuxuu la kulmay geedkaani oo ku faafay degaanka.
“Cawskii ay caanka ku ahayd dooxadu, xoolahana u nacfiga badnaa sida sifaarkii, dureemadii, sixidii iyo sarinkii wuu nabaad guuriyay. Sidoo kale dooxadii wuu xidhay. Waxaa nooga sii daran bahal oo dhan ayaa dhulkii yimid oo geedkan gabbaad ka dhigtay. Labaatankii maalmood ee la soo dhaafay afar neef oo adhi ah waxaa iga dilay waraabe iyo gadduudane,” ayuu yiri Maxamed.
Tiraba ilaa afar jeer ayay dadka deegaanku isku dayeen inay geedkan wax ka qabtaan laakiinse kumaysan guulaysan, iyagoo jaray, gubay sidoo kalana ku shubay naafto.
Markii ugu dambaysay ayaa ahayd markii ay xilligaan gu’ga deegaanka ku soo noqdeen, waxayna sheegeen caqabadda ugu wayn ee hortaagan oo ah dhulka uu qabsaday oo ballaaran.
Quulle Maxamed wuxuu ka mid yahay dadka deggen deegaanka Gebi dheero wuxuu Raadiyow Ergo u sheegay in labo habeen ka hor hal irmaan oo uu lahaa ay dhimatay kadib marka ay daaqday abqada geedka.
“Hashan aan carruurta u maali jiray waxay daaqi jirtay geedkan garan-waaga ah abqadiisa caloosha ayaa laga qabtay. Way dibbirtay dadaal kasta waan samaynay hashii waan naga bakhtiday. Si aan u ogaado waxaa dilay calooshii ayaan dillaaciyay mise xiidmihii oo dhan waxaa sidaa isugu maray qabcadii garan-waaga,” ayuu yiri Quulle oo ah xool0-dhaqatada ku soo laabtay degaanka.
Xuseen Xalane oo ah guddoomiyaha iskaashatada beeralayda Xalin wuxuu Raadiyo Ergo u sheegay in beero 80 ah uu geedkaani qabsaday oo dadkii lahaa uga hayaameen, kuwaas oo nolol u raadsaday Laascaanood.
Maxamed Suleymaan Cali waa khabiir bartay cilmiga deegaanka iyo beeraha, madaxna u ah ururka ilaalinta deegaanka ee Dalcagaarshe oo ka dhisan gobolka Sool.
“Waana geed doog iyo jilaalba caleentiisu tahay mid cagaaran. Waa geed iniinta ka dhacda ay soo baxayso, xoolaha marka ay daaqaan saalladooda ayaa sii fidinaysa oo deegaanno hor leh ku sii faafinaysa, meeshi geed ka baxo wuu ku faafi,” ayuu yiri Maxamed.
Maxamed ayaa tilmaamay in geedkan lagula tacaali karo in la gubo.
