Cilmi-baaris lagu sameeyay habka uu u shaqeeyo iyo duruufaha ku gadaaman suuqa Bakaaraha oo ah rugta ganacsi ee ugu weyn Soomaaliya ayaa maanta lagu soo bandhigay magaalada Muqdisho. Sida ay cilmi-baaristu sheegtay waxaa suuqa ku yaalla 7,000 oo dhisme oo ay ka howlgalaan 21,000 oo ganacsi oo kala duwan.
Waxaa laga hadlay xaaladda ay ganacsatu ku shaqeeyaan, qaabka canshuurta, adeegyada uu suuqu ku tiirsan yahay ee korontada iyo biyaha, arrimaha la xiriira waddooyinka dhex mara suuqa iyo caqabadaha lagala kulmo xilliyada ay gubashadu dhacdo.
Maxamed Mukhtaar Ibraahim oo ah madaxa Machadka SIPAM oo cilmi-baarista sameeyay, oo sidoo kale ah Wasiirkii hore batroolka iyo macdanta ee xukuumadda Soomaaliya ayaan ka wareysannay cilmi-baarista.
Wuxuu sheegay in cilmi-baarista noocaan oo kale ah ay gacan ka geysan karto qorshe sida uu xusay ay dowladdu waddo oo la xiriira isku furanka dhaqaalaha iyo ganacsiga ee dalalka gobolka.
Halkan hoose ka dhegeyso wareysi uu Maxamed Mukhtaar siiyay Raadiyo Ergo. Waxaa wareystay Cabdiraxmaan Taysiir.
